Денеска е 11 јануари според стар стил и се слави Преподобен Теодосиј Велики.

Прв востановител и устроител на монашкото општежитие. Роден е во областа Кападокија, во селото Могаријаси, од благочестиви родители.

Како млад го посети светиот Симеон Столпник којшто го благослови и му прорече голема духовна слава. Со кадилницата во која стави ладно ќумурче и темјан, Теодосиј бараше место за да се насели и да основа манастир и запре таму каде што ќумурчето само од себе се разгоре.

Овде се насели и почна да се подвизува. Наскоро околу него се собраа монаси од странски земји. Затоа изгради по една црква за секој јазик на кој се зборуваше во обителта и во слава Божја истовремено се служеше и пееше на грчки, ерменски, грузиски итн. Но, во денот кога се причестуваа, сите браќа се собираа во големата црква во која се служеше на грчки.

Трпезата и имотот им беа заеднички на сите, трудот и трпењето заеднички, а неретко и гладувањето. Теодосиј им беше возвишен пример за живот на сите свети монаси, пример во трудот, во молитвата, постот, бдеењето и во сите христијански добродетели.

И Бог му подари дар на чудотворство, па можеше да исцелува болни, да се јавува на далечина и да помага, да умножува леб и пченица.

Молитвата му беше на усните дење и ноќе. Се упокои мирно во Господа кога имаше сто и шест години, во 529 година.

Според календарот на МПЦ (Јулијанскиот календар) денеска е 9 јануари.

Денеска е Св. маченик Полиевкт.

Свети Полиевкт се прослави за време на гонењето на римскиот император Валеријан (253 – 260). Тој беше римски војник, незнабожец, но имаше големо пријателство со еден друг војник христијанин Неарх. Големата љубов што ја чувствуваше кон Неарх му го отвори умот и срцето за самата љубов, т. е. за христијанскиот Бог.

Како христијанин, свети Полиевкт беше погубен во градот Мелитина на реката Еуфрат, а по него беше погубен и Неарх. Моштите на свети Полиевкт се наоѓаа во Мелитина се до 15-от век.

КАТОЛИЧКИ КАЛЕНДАР: Денеска е Св. Винко.

Покрај светиот Стјепан, прв ѓакон и маченик, свети Ловр, римски ѓакон и маченик, црквата го почитува и третиот ѓакон, свети Винко. Тој бил ѓакон во црквата во хиспанскиот град Цезараугусти, денешна Сарагоса. Бил жртва на крвавите Диоклецијанови прогонства. Од него барале да се одрекне од верувањето во Христос, а тој избрал да биде мачен.

Денеска е 6 јануари според стар стил, се слави Богојавление или Водици, а именден слават Јордан, Јорданка…

Кога Господ Исус наврши триесет години од своето телесно раѓање, го започна својот учителски и спасителен подвиг. Почетокот стана со Крштението на реката Јордан.

Кога Исус Христос се крштеваше во водата на Јордан, на светот му се објави тајната на Божествената Троица. Отецот му се јави на сетилото за слух, Духот на сетилото за вид, а Синот дури и на сетилото за допир. Отецот го изговори своето сведоштво за Синот, Синот се крсти во водата, а Светиот Дух во вид на гулаб лебдеше над водата.

А кога свети Јован Крстител посведочи и рече за Христа: „Еве го јагнето Божјо кое на Себе ги зеде гревовите на светот“ (Јн. 1, 29) и кога го потопи и крсти Господа во Јордан, со тоа се покажа и Христовата мисија во светот и патот на нашето спасение. Зашто Господ ги зеде врз себе гревовите на родот човечки и под нив умре (потопувањето) и оживеа (излегувањето од водата); а и ние мораме да умреме како стар и гревовен човек, а да оживееме очистени, обновени и преродени.

Тоа е Спасителот и тоа е патот на спасението. Празникот Богојавление (на грчки Теофанија) се нарекува и Просветување. Зашто настанот на Јордан нè просветлува покажувајќи ни го Бога како Троица едносуштна и неразделна. И второ, бидејќи секој од крстените во вода се просветлува со тоа што станува восиновен од Отецот на светлината, со заслуга на Синот, со силата на Светиот Дух.