Во Пула беше претставен првиот електричен воз на батерии во Хрватска, изработен од компанијата КОНЧАР – Електрични возила.

Возот го реализираше своето прво тест-возење по истарската пруга, додека инженерите ги спроведуваат завршните испитувања на системот за полнење на новата батериска станица.

Овој современ воз достигнува брзина до 120 километри на час и може да помине повеќе од 200 километри со едно полнење. Според најавите, редовниот сообраќај ќе започне до крајот на следната година — чекор што ја приближува Хрватска кон позелена и помодерна железничка иднина.

САД соопштија дека во 13 напади на бродови во близина на Венецуела и источниот Пацифик од септември досега загинале повеќе од 60 лица. По инцидентите, лидери, правни експерти и семејства на загинатите побараа докази за наводното шверцување дрога, пренесе Ројтерс.

Американскиот министер за одбрана Пит Хегсет изјави дека мета биле бродови кои пренесувале нелегални наркотични супстанци, но САД досега не презентирале докази што го потврдуваат тоа.

Меѓународни организации, меѓу кои и високи претставници на ОН за човекови права, ги осудија нападите како прекршување на меѓународното и хуманитарното право. Венецуела ги нарече акциите „убиства“ и „агресија“, а претседателот Николас Мадуро го обвини американскиот претседател Доналд Трамп дека се обидува да ја сруши неговата власт.

Заменик-премиерот на Украина за европски и евроатлантски интеграции, Тарас Качка, изјави дека унгарската блокада на европските интеграции на Украина би можела да биде укината по состанокот меѓу Виктор Орбан и американскиот претседател Доналд Трамп.

Според Качка, клучно е САД да разберат зошто е неопходна согласноста на Унгарија за започнување на пристапните преговори меѓу Киев и Европската Унија.

„Од наша страна, на ова прашање му посветивме големо внимание, а претседателот Зеленски веќе зборуваше за тоа. Дали ова прашање – односно укинувањето на унгарското вето – би можело да биде решено за време на разговорите меѓу Трамп и Орбан? Постојат очекувања дека да,“ изјави Качка.

Тој додаде дека станува збор за билатерална средба меѓу американскиот и унгарскиот лидер, и дека „сè сепак зависи од директниот дијалог“ меѓу Украина и Унгарија.

„Овој состанок може да помогне, како и ставовите на лидерите на земјите членки на ЕУ кои се идеолошки поблиски до Орбан. Нашата задача е да работиме на сите овие фронтови. Верувајте ми, разговаравме дури и со јапонската влада за ова,“ додаде украинскиот заменик-премиер.

Претходно, украинскиот претседател Володимир Зеленски изјави дека го замолил Доналд Трамп да го искористи своето влијание врз унгарскиот премиер Виктор Орбан, кој го блокира напредокот на Украина кон Европската Унија.

Состанокот меѓу Орбан и Трамп треба да се одржи во Вашингтон на 7 ноември.