Македонија

МНР ја презеде Бесмира Ејупи: Презентерката по скратена постапка ќе стане дипломат

Поранешната презентерка Бесмира Ејупи, во јавноста позната и како несудената конзулка во Њујорк, можеби сепак ќе има шанса да замине во странство, но овој пат како кадар на Министерството за надворешни работи, барем според предвидувањата на вработени во него. Ејупи од минатиот месец е редовно вработена во МНР. Не со конкурс, ниту со договор на дело, туку била преземена од друга државна институција. Официјално, МНР и натаму молчи и нема никакво објаснување за целиот случај.

Според извори од Министерството, не се знае од која институција е преземена Ејупи, но техничката процедура за нејзиното вработување е завршена и почната е постапката за добивање безбедносен сертификат. Нејзиното работно место, како што објави опозициската ВМРО-ДПМНЕ, е соработник во Одделението за правни работи, но нашите извори од МНР велат дека тоа не е пречка таа да се подготвува за одење во дипломатска мисија.

-Кога би се одело според регуларна постапка, потребни се две години за да се подготви за заминување во некое дипломатско-конзуларно претставништво (ДКП). Треба да помине по 4-5 месеци во различни сектори, вклучувајќи и конзуларно одделение, протокол и слично. Исто така, би било добро да ја помине и дипломатската академија во МНР – објаснуваат за „Слободен печат“ дипломатски извори.

Но, „постапката“ може да се поедностави така што Ејупи може да биде упатена на испомош во МНР, што е регуларна практика во Министерството, но по извесно време да биде именувана за конзулка, на пример.

Кога во февруари годинава беше објавена информацијата дека на затворена владина седница бил утврден предлогот Бесмира Ејупи да биде испратена за генерален конзул во Њујорк, МНР реагираше на тие, како што ги нарече, нецелосни информации.

„Би сакале да реагираме на многубројните објавени нецелосни информации поврзани со испраќањето на дипломати во ДКП-ата. Со оглед дека станува збор за информации од доверлив карактер, дозволете да информираме дека Република Северна Македонија во моментов има Генерален конзул во Тотова (Њу Џерси), Јордан Панев, кој е дипломат од кариера и кој е избран во согласност со сите законски прописи. Во моментов тој е на половина од својот мандат и засега не се предвидува негова предвремена замена“, пишуваше во реакцијата од МНР, без објаснување на што се однесуваат „информациите од доверлив карактер“, но и зошто се „нецелосни“.

Повеќе од еден месец подоцна, Државната комисија за спречување корупција (ДКСК) отвори предмет по допрен глас и почна проверка на податоците од институциите во врска со објавени информации дека на Ејупи ѝ биле извршени 39 трансакции од страна на буџетски корисници. Комисијата тогаш отвори постапки за гонење на одговорните лица на општините Петровец, Сарај, Брвеница и Чаир и Државното правобранителство, за склучените договори за дело со Ејупи, која врз основа на договори за дело добивала пари од четири општини и од една државна институција. Катица Николовска од ДКСК тогаш рече дека, имајќи предвид дека Законот вели дека под корупција се подразбира злоупотреба на функција, јавно овластување, службена должност или положба за остварување корист директно преку посредник за себе и за други, јасно е дека за овие ситуации постои можност и за кривично гонење.

Николовска вчера за „Слободен печат“ изјави дека досега добиле одговор само од тетовското обвинителство дека нема елементи за кривично гонење, а очекуваат одговори и од другите обвинителства.

Македонија

ВЛЕН: Решени сме да ја демонтираме културата на неказнивост

По повод Меѓународниот ден против корупцијата, коалицијата ВЛЕН испрати остра и јасна порака дека овој ден не е формалност за празни изјави, туку силен аларм за „болеста“ што со години ги разградува темелите на државата.

Од ВЛЕН нагласуваат дека корупцијата не е само кршење на законот, туку предавство кон граѓаните, кражба на иднината и уништување на јавната доверба. Според нив, корупцијата не се бори со зборови или документи „за око на јавноста“, туку со храбри одлуки, чесни луѓе и целосно отфрлање на компромисите со криминалот.

„Државата не се чисти со декларации, туку со карактер. Институциите не се градат со пропаганда, туку со интегритет. А правдата не е луксуз, туку обврска“, порачуваат од ВЛЕН, истакнувајќи дека се решени да ја демонтираат културата на неказнивост и да изградат систем во кој власта не е привилегија, туку одговорност.

Во соопштението се додава дека рамнодушноста значи соучесништво, а молкот – поддршка за неправдата. „Денес не е доволно само да се осуди корупцијата, туку мора да се искорени до корен“, велат од ВЛЕН.

Коалицијата повторува дека останува непоколеблива во своите принципи: нулта толеранција кон корупцијата, нулта компромис со криминалот и нулта страв од вистината.

Македонија

Општина Битола делумно ги исплати средствата на избирачките одбори

Општина Битола ја извести јавноста за утврдената постапка и динамика за исплата на финансиските надоместоци на членовите на избирачките одбори, кои беа ангажирани за реализација на локалните избори во 2025 година.

Од секторот за односи со јавност информираат дека, во согласност со законската обврска, веќе е реализирана исплата на 25 отсто од вкупната сума од буџетот на Општина Битола. За оваа делумна исплата, претседателите на избирачките одбори се соодветно известени.

Преостанатите 75 отсто од средствата се интегрирани и предвидени во Предлог-буџетот на Општина Битола за 2026 година. Овој предлог-буџет е веќе доставен до советниците во Советот на Општина Битола и се очекува да биде изгласан пред завршувањето на тековната календарска година.

Од Општината нагласуваат дека финалната исплата на надоместоците за сите членови на избирачките одбори ќе биде реализирана во текот на првиот квартал од следната година.

Македонија

Муцунски во Абу Даби: Потврдена силна соработка меѓу Македонија и ОАЕ

Министерот за надворешни работи и надворешна трговија, Тимчо Муцунски, денеска оствари средба во главниот град на Обединетите Арапски Емирати (ОАЕ) со неговиот колега за надворешна трговија, шеикот Тани бин Ахмед Ал Зејуди. Овој состанок не беше само формалност, туку динамичен чекор напред кој ги потврди веќе одличните билатерални односи и го истакна потенцијалот за нивно натамошно продлабочување

Акцентот на разговорите беше ставен на највисоките приоритети: економијата, трговијата и инвестициите. Ова е областа каде двајцата министри гледаат најголем простор за соработка.

Како што известува Министерството за надворешни работи и надворешна трговија, Муцунски и Ал Зејуди јасно ја потврдија подготвеноста на двете држави да ја интензивираат соработката во клучни сектори од заемен интерес. Овие сектори ги вклучуваат инфраструктурата, енергетиката, туризмот и технологијата.

Не е тајна дека ОАЕ е глобален лидер и визионер во иновациите, а соработката токму во овие области може да донесе вистинска трансформација за Македонија.

Двајцата соговорници беа единствени во оценката дека денешната средба е многу повеќе од протокол – таа ширум ја отвора вратата за нови, значајни инвестиции и заеднички проекти.

Овие иницијативи, како што се нагласува во соопштението, драматично ќе ја зајакнат економската поврзаност меѓу Македонија и Обединетите Арапски Емирати.

Оваа средба претставува силен сигнал за бизнис заедниците од двете страни и ветува плодна економска пролет.