Олмерт предупредува: Планот за „хуманитарен град“ во Газа наликува на концентрационен логор

Поранешниот израелски премиер Ехуд Олмерт остро го критикуваше најавениот израелски план за изградба на таканаречен „хуманитарен град“ во јужниот дел на Појасот Газа, предупредувајќи дека таквиот потег би можел да се протолкува како етничко чистење.

„Тоа би бил концентрационен логор. Жал ми е“, изјави Олмерт, додавајќи дека Израел веќе е обвинет за воени злосторства во Газа и на Западниот Брег, но дека овој чекор би значел сериозна ескалација.

Според најавите од израелскиот министер за надворешни работи, Израел Кац, планираното населување првично би опфатило 600.000 лица, а со време и целото палестинско население од регионот. Тој веќе наредил изработка на оперативни планови, нагласувајќи дека Палестинците што ќе бидат сместени таму, нема да имаат право да заминат, освен доколку заминат во трети земји.

Олмерт предупредува дека создавање логор за стотици илјади луѓе, без можност за враќање, не може да се толкува поинаку освен како форма на депортација. „Ако тие треба да бидат преселени во нов ‘хуманитарен град’, тогаш тоа неизбежно ќе се смета за етничко чистење“, рече тој.

Сепак, тој нагласува дека досегашната евакуација на цивили од зони на конфликти е во рамки на меѓународното право, особено доколку се дозволи нивно враќање по завршување на воените дејства.

Планот има поддршка од премиерот Бенјамин Нетанјаху, а според израелските медиуми, токму одбивањето на Израел да се повлече од зоната предвидена за кампот е една од главните пречки во разговорите за прекин на огнот.

„Кога градите камп каде што се преселуваат стотици илјади луѓе, перцепцијата не е дека тие се спасени, туку дека се протерани и отфрлени. Јас немам друга перцепција“, рече Олмерт.

Израелската влада тврди дека планот има за цел заштита на цивилите. Сепак, дел од израелската јавност која го споредува проектот со концентрационен логор беше остро критикувана поради историските паралели со нацистичка Германија.

Во ирскиот град Тјум, округ Голуеј, започна ископување на масовна и необележана гробница за која се верува дека содржи останки од околу 800 бебиња. Гробницата потекнува од периодот меѓу 1925 и 1961 година, кога калуѓерки од редот „Бон Секур“ ги закопувале новороденчињата починати во институцијата за мајки и деца „Света Марија“.

Според „Гардијан“, дел од децата биле погребани без евиденција, во напуштен подземен септичен резервоар, на површина од околу 5.000 квадратни метри. Домот бил прибежиште за невенчани мајки и нивните деца, кои живееле во услови на сиромаштија и социјална стигматизација.

Ископувањата, кои ќе траат две години, се дел од напорите на Ирска да се соочи со историските злоупотреби во верски и државни установи. Историчарката Кетрин Корлес, која го покрена случајот со откривањето на 796 смртници, изјави дека чувствува олеснување по почетокот на работите.

Ископувањата ги води тим од 18 експерти од неколку земји, предводени од Даниел Максвини, поранешен претставник на Меѓународниот комитет на Црвениот крст. Целта е ексхумација и можна идентификација на останките, кои ќе бидат вратени на семејствата за достоен погреб.

Процесот се одвива според форензички стандарди, со обврска секој доказ за насилна смрт веднаш да се пријави. Поради подземни води и сложен терен, се користи специјална опрема и на самото место е поставена лабораторија за анализа. Некои семејства веќе доставиле ДНК примероци.

Домот „Света Марија“ бил затворен во 1961 година, а на негово место подоцна е изградена станбена населба. Ирската држава, според извештаите, со децении ги игнорирала нехуманите услови во установата.

Корлес изрази надеж дека барем дел од останките ќе можат да бидат идентификувани и додаде дека тимот е целосно посветен на откривање на вистината.

Трамп најави испорака на „Патриот“ системи за Украина

Американскиот претседател Доналд Трамп најави дека Соединетите Американски Држави ќе ѝ испратат на Украина системи за противвоздушна одбрана „Патриот“, со цел да ѝ помогнат во одбраната од руските напади.

„Ќе им испратиме „Патриот“, кои им се очајно потребни“, изјави Трамп, но не го прецизираше бројот на системи што ќе бидат испорачани. Оваа изјава доаѓа во услови на зголемена тензија и заладени односи помеѓу Трамп и рускиот претседател Владимир Путин.

Најавата следува само две недели по одлуката на Вашингтон за привремено запирање на одредени воени испораки за Киев, што предизвика загриженост меѓу украинските власти.

На истата прес-конференција, Трамп се осврна и на состојбата во Појасот Газа. Тој изјави дека разговорите за прекин на огнот се во тек и изрази надеж дека ќе има напредок во текот на следната недела, и покрај моменталниот застој на преговорите што се водат во Доха.

„Во врска со Газа – водиме разговори и се надевам дека ситуацијата ќе се разјасни во наредните денови“, изјави Трамп, задржувајќи го оптимистичкиот тон што го имаше и на Денот на независноста, 4 јули.