Грчките власти пријавија три смртни случаи во еден ден на различни локации долж крајбрежјето, во екот на летната туристичка сезона.

Според информациите на „Прототема“, првиот случај е забележан во недела напладне, кога крајбрежната стража во Солун добила пријава за тело на жена пронајдено во морскиот дел на пристаништето. Жртвата, на возраст од околу 50 до 55 години, сè уште не е идентификувана, а не е позната ниту нејзината националност. Централната пристанишна управа на Солун води прелиминарна истрага за случајот.

Неколку часа подоцна, 82-годишен маж бил пронајден во несвест на плажата Плака на островот Тилос. Брзата помош го пренела во болницата Ливади, каде што бил прогласен за мртов. Истиот ден, уште еден маж на 88-годишна возраст бил пронајден во несвест на плажата Микиверна во Полигирос, Халкидики. И за овој случај е во тек истрага за утврдување на причината за смртта.

Грчките власти апелираат до туристите и локалното население да бидат особено внимателни при престојот на плажите и во морето, особено за постарите лица и лицата со здравствени ризици, имајќи ја предвид високата фреквенција на посетители и температурите во текот на летото.

Во Грција продолжува борбата со нов голем пожар што зафати пошироко подрачје со расфрлани станбени згради. Според грчкиот портал „Прототема“, во гаснењето учествуваат 42 пожарникари и тимови на планинари на терен, додека од воздух интервенираат пет противпожарни авиони и два хеликоптери.

Иако засега нема информации за повредени или загинати, пожарот се приближува до населени места, но надлежните уверуваат дека засега нема непосредна опасност за објектите.

Ова е само еден од низа пожари што ја зафатија Грција во последните денови. Изминатата недела беа регистрирани повеќе активни жаришта, а високите температури и сувиот ветер придонесуваат за брзото ширење на огнената стихија.

Во петокот пожар избувна и во регионот околу Солун, но беше навремено изгаснат. Во него беа уништени неколку хектари, но за среќа немаше човечки жртви. Причината за новиот пожар сè уште не е утврдена.

Властите апелираат до граѓаните и туристите да останат информирани и да ги следат упатствата на службите, особено оние кои престојуваат во области со зголемен ризик од пожари.

Албанија бележи највисоко намалување на населението во Европа, покажуваат најновите податоци на Евростат, обработени од албанскиот портал „Монитор“. Заклучно со крајот на 2024 година, населението на земјата се намалило за 18,2% во споредба со 2011 година, што претставува пад од над 500.000 жители. Албанија сега има само 2,36 милиони жители.

Овој процентуален пад е најголем во Европа, според Евростат. Веднаш по неа следат Бугарија со пад од 12,3% и Северна Македонија со 11,4%. Сериозен пад бележат и Босна и Херцеговина (-11,2%), Хрватска (-9,7%), Латвија (-9,4%) и Србија (-9%). Единствена земја во регионот што бележи благ пораст е Црна Гора со +0,6%.

Главните причини за драстичниот пад во Албанија се забавувањето на природниот прираст, кој е речиси на нула, и високиот степен на емиграција. Само во 2024 година, земјата има нето емиграција од 28.800 лица – втор највисок број во Европа по Турција. Од 90-тите години досега, просечно околу половина милион Албанци ја напуштале земјата во секоја деценија.

Демографските промени го зафатија и профилот на популацијата. Средната возраст во Албанија денес изнесува 44,3 години, во споредба со 31,9 години во 2010, што ја доближува земјата до просекот на Европската Унија (44,7 години). Стареењето на населението, заедно со масовната емиграција, веќе имаат сериозни економски последици: недостиг на работна сила, ограничување на продуктивноста, зголемени трошоци за работна сила и закана за одржливоста на пензискиот систем.

За разлика од земјите од Источна Европа, западноевропските држави бележат пораст на населението, главно благодарение на активни имиграциски политики. Еврозоната бележи зголемување од 3,2% од 2011 година. Германија, која ги олесни процедурите за работни дозволи, го зголеми бројот на жители за 4%, додека Шпанија за 4,5%.

И покрај јасните трендови, албанската влада сè уште не презема сериозни чекори за справување со демографската криза, предупредуваат експертите. Ако овие трендови продолжат, последиците ќе бидат долгорочни и длабоки – не само за Албанија, туку и за целиот регион.