Украинскиот министер за одбрана, Рустем Умеров, соопшти дека во Киев одржал средба со американскиот генерален изасланик Кит Келог, каде што биле разгледани важни теми за постигнување „одржлив и праведен мир“.

Умеров изрази благодарност до САД за нивната поддршка, истакнувајќи дека таа „спасува животи и го приближува крајот на војната“. Посебен акцент бил ставен на соработката во одбранбената индустрија, вклучително и локализацијата на производството на оружје во Украина и Европа. Некои проекти веќе се во тек, додаде тој.

Заменик-министерот Сергиј Боев порача дека Украина е подготвена за долгорочно примирје, но безбедноста мора да почива на силна војска и развиена одбранбена индустрија.

Министерот нагласи дека Украина располага со единствено борбено искуство, особено во користењето дронови, и е спремна да го сподели тоа знаење. Голем дел од иницијативите можат да вклучуваат европски партнери или финансирање преку замрзнатите руски средства.

На средбата било разговарано и за санкциите, при што Умеров истакна дека рускиот енергетски сектор останува главен извор на финансии за војната и мора системски да се ограничува.

Украинската страна ги информирала американските претставници за оперативната состојба, непријателските планови и проценките дека Русија се подготвува за поширок воен конфликт, не само против Украина, туку и против НАТО.

Како што неодамна најави американскиот претседател Доналд Трамп, Украина ќе добие „многу напредна“ воена опрема, која покрај одбранбени системи како „Патриот“, најверојатно ќе вклучува и офанзивно оружје со далекусежни ракети со кои ќе може да се гаѓаат цели во Москва.

Украинската безбедносна служба (СБУ) соопшти дека уапсила две жени осомничени како агентки на Русија, кои наводно работеле на подготвување терористички напади на територијата на Украина.

Според соопштението, двете биле веќе осудувани и биле мотивирани од желбата за „лесна заработка“. Истражителите тврдат дека тие имале јасна задача: идентификација и шпионирање на потенцијални цели – украински воени и државни функционери.

„За да ги подготват нападите, агентките се ‘разделиле’: едната останала во Полтава и почнала да ги следи местата на работа и живеење на потенцијални ‘мети’, додека другата заминала за Днипро со иста задача“, се вели во извештајот на СБУ.

Истражната постапка е во тек, а украинските власти најавуваат дополнителни детали во наредните денови.

Американскиот претседател Доналд Трамп денес најави драстична промена во својата политика кон војната во Украина, поставувајќи ултиматум до Русија: доколку Москва не прифати мировен договор во рок од 50 дена, ќе воведе 100% царини на руските производи. Истовремено, Трамп најави масовна испорака на оружје за Украина преку НАТО, кое ќе го финансираат европските членки на алијансата.

„Испраќаме врвно оружје до НАТО, а тие ќе го достават до Украина. Европа ќе плати“, рече Трамп, истакнувајќи дека е разочаран од руското однесување. „Путин зборува убаво, а навечер бомбардира сѐ.“

Руската страна веднаш одговори со презир. Кремљ соопшти дека „ултиматумот не допира никого во Москва“ и дека Русија нема намера да преговара под закани.

Украинскиот претседател Володимир Зеленски, пак, веднаш стапил во контакт со Трамп. Двајцата лидери се договориле за почести комуникации и усогласување на следните чекори.

Во меѓувреме, руските воздушни напади врз украински цели стануваат сѐ поинтензивни, а руските медиуми предупредуваат дека „ова може да прерасне во нуклеарен ултиматум“.

Мировен договор во 50 дена или економска војна – светот со нетрпение чека да види кој ќе попушти прв.