Центарот за управување со кризи (ЦУК) утринава објави извештај за состојбата со пожарите на отворен простор, заклучно со 07:00 часот на 14 јули 2025 година.

Според податоците, во моментов се активни пет пожари, додека 19 се целосно изгаснати, а нема пожари под контрола.

Активни пожари се пријавени на следните локации:

Општина Дојран, село Николич – гори нискостеблеста шума.

Општина Чучер Сандево, село Горњани – исто така зафатена нискостеблеста шума.

Општина Велес, во близина на селата Џидимирци и Крушје – зафатена мешана шума.

Општина Македонски Брод, меѓу селата Црешнево, Локвица, Крапа и Слатина – опожарена дабова шума, грмушки и ниска вегетација.

Општина Прилеп, населба Три Багреми – гори ниска вегетација.

ЦУК апелира до граѓаните да бидат крајно внимателни, да не палат оган на отворено и веднаш да пријават било каков сомнителен чад или оган.
Службите се постојано на терен и се преземаат мерки за локализирање и гаснење на пожарите.

Македонија под влијание на топол бран од Африка, температури до 38 степени!

Продолжува периодот на суша и на стабилно и суво, како и сончево време во нашата Република Македонија со појава на мала до умерена локална облачност. Повремено ќе засилува и ветерот од северен правец. Во периодот од понеделник (14 јули па до петок 18 јули) ќе бидеме под топол бран од југ, односно од Африка, и истиот ќе биде по умерен за разлика од изминатиот прв топол бран кој ја зафати нашата Македонија и донесе многу високи температури на воздухот над 40 степени.

Во текот на оваа работна недела, додека трае по умерениот топол бран од Африка, максималните дневни температури на воздухот ќе се искачуваат во интервалот од 31 до 38 степени, додека во Скопје и околината температурата ќе се искачи до околу 37/38 степени. И во Скопскиот регион повремено ќе засилува ветерот од северен правец.

Ув индексот во текот на оваа работна недела ќе има висока до многу висока вредност и ќе изнесува 9.

Барем одсега гледано, во најава немам никаков поголем влажен бран кој би ја прекинал оваа голема суша што ја зафати нашата Македонија, што значи дека некои пообилни врнежи засега нема на повидок, освен утре (вторник 15 јули како и во петок 18 јули) кога во попладневните часови ќе има услови за појава на локален краткотраен дожд и грмежи, особено во планинските предели.

Премиерот Христијан Мицкоски присуствуваше на свеченото пуштање во употреба на новиот автопатски дел од Кичево до Охрид, во должина од 20 километри. Оваа инфраструктурна делница, од Пресека до Песочани, според него, е доказ дека кога ќе се превземе одговорност со искрена намера и чиста совест, промените се остварливи.

„Денес заедно сведочиме на нешто што за многумина делуваше веќе невозможно. Ова не е само пуштање на автопатска делница, туку момент на враќање на вербата“, изјави Мицкоски.

Премиерот истакна дека само една година по преземањето на одговорноста за водство на државата, успеале да го откочат еден од најголемите и најзаглавените инфраструктурни проекти во Македонија, што е значаен чекор кон подобрување на патната мрежа и поврзаноста во земјата.