Европската ракометна федерација (ЕХФ) денеска официјално го затвори случајот со финалниот реванш меѓу РК Алкалоид и АЕК Атина, кој не се одигра во Скопје.

Грчкиот тим не се појави на теренот поради незадоволство од бројот на дозволени навивачи, по што ЕХФ ја донесе одлуката натпреварот да биде регистриран со службен резултат 10-0 во корист на македонскиот претставник, кој победи и на првиот натпревар во Атина со 29-25.

Алкалоид доби и парична казна од 5.000 евра поради неисполнување на обврската за обезбедување доволно билети за гостинските навивачи.

Најтешката санкција ја доби АЕК, кој покрај паричната казна од 20.000 евра, доби и двегодишна суспензија од сите европски натпреварувања.

Српски ММА борец убиен во Канада заедно со својата девојка

Српскиот ММА борец Страхиња Гавриловиќ и неговата партнерка Едит Дима се убиени во вооружен напад што се случил во центарот на Шербрук, град во канадската провинција Квебек. Информацијата првично ја објави угледниот канадски медиум La Tribune, а веста ја потврдија и локалните власти.

Полицијата моментално спроведува интензивна истрага и трага по сторителите на нападот. Во оваа фаза од истражниот процес, не се разгледува можноста за фемицид или семејно насилство како мотив за злосторството.

„Истрагата е во тек. Нашите екипи се на терен, разговараат со сведоци и ги анализираат безбедносните камери од околината. Се собираат сите релевантни информации кои би можеле да помогнат во расветлување на случајот“, изјави портпарол на полицијата на провинцијата Квебек.

Случајот го презеде државната истражна служба на Квебек.

Страхиња Гавриловиќ имаше кариера во мешаните боречки вештини (ММА), во која настапи на 14 борби, од кои осум ги доби, а шест загуби. Последен пат влезе во рингот во 2022 година.

Победа на Џорџ Расел и инцидент на Мекларен ја обележаа трката за Големата награда на Канада

Трката за Големата награда на Канада донесе возбудливи моменти, а победата на Џорџ Расел и првиот подиум за 18-годишниот Андреа Кими Антонели беа само дел од настаните што го обележаа настанот. Сепак, најголемата драма се случи во тимот на Мекларен, кога Ландо Норис се судри со својот тимски колега Оскар Пјастри.

Норис беше принуден да ја напушти трката по инцидентот кој се случи во 66. круг, кога се обиде да го престигне Пјастри од надворешната страна во првата кривина. Сударот го оштети неговиот болид, додека Пјастри продолжи да се бори и заврши на четвртото место. По трката, Норис призна дека направил грешка и изрази каење.

„Не очекував да го прескокнам Оскар од надворешната страна во првата кривина. Не требаше да се обидам. Мислев дека почна да свртува десно, па мислев дека имам мала шанса да свртам лево. Но, тоа беше преголем ризик, особено за мојот колега. Среќен сум што ништо не му се случи. Ја платив цената за мојата грешка“, изјави Норис.

Мекларен, и покрај инцидентот, дозволува на своите возачи да се натпреваруваат еден против друг, бидејќи и Норис и Пјастри се сериозни кандидати за шампионатот. Норис сега се наоѓа на второто место со 176 поени, 22 поени зад Пјастри, кој има 198 поени. На врвот на шампионатот е Макс Ферстапен со 155 поени, по завршувањето на трката во Монтреал.

„Нашето прво правило е да нема контакт со тимскиот колега, а јас го прекршив токму тоа. Мекларен е моето семејство, се тркам за нив секој викенд. Кога ќе направам ваква грешка и ќе ги разочарам, многу се каам“, додаде Норис.

Ландо веднаш по трката му се извини на Пјастри, додека Австралиецот даваше изјава, и со тоа ја зачува атмосферата на тимска солидарност во Мекларен.