Инфо +

“МЕТЕОАЛАРМ” СЕРИОЗНО ПРЕДУПРЕДУВАЊЕ ЗА СНЕЖНО НЕВРЕМЕ ВО МАКЕДОНИЈА: Од викендов обилни врнежи од снег насекаде низ Македонија!

Под влијание на голем влажен бран кој ќе навлезе во Македонија од југ и од југозапад, во склоп со спуштањето на многу поладен воздух од север, од овој викенд, особено од утрешната ноќ кон недела, како и во недела и во понеделник насекаде во Македонија ќе има обилни врнежи од снег, па така насекаде ќе се формира снежна покривка, а сето ова ќе биде проследено со повремено засилен ветер од северен правец, па токму поради ова ќе има и појава на снежни наноси.

На многу места во Македонија ќе се формира позначителна снежна покривка (во градовите од 15 до 20 сантиметри, локално и над 30 сантиметри, додека на планинските места и на Скијачките центри се очекува нов снег со висина од над 50 сантиметри, па дури до околу еден метар).

Со овој голем снежен и ладен бран од север, снег и снежна покривка ќе се формира и во Скопската котлина, и тоа со висина од 10 до 15 стантиметри, а на околните планини, како и во повисоките предели од котлината таа ќе биде значително поголема. И во Скопје и околината ќе дува засилен ветер од северен правец.

СЕРИОЗНО ПРЕДУПРЕДУВАЊЕ: Со оглед на тоа дека не очекуваат обилни снежни врнежи насекаде во Македонија, на возачите им препорачувам да бидат крајно внимателни како управуваат со своите возила, особено доколку се движат низ планинските превои, каде поради ниските температури ќе има појава на голомразица. Исто така, Скијачите кои ќе се наоѓаат на Скијачките центри, ги советуваме да не се движат кон поголеми надморски височини поради обилните врнежи од снег и значително намалената видливост која ја очекуваме.

Што се однесува до температурите, тие ќе бидат многу ниски и насекаде ќе се спуштаат под нулата во ноќните и во утринските часови, а и преку ден тие на многу места ќе се движат до околу, па и под нулата, а само во југоисточните предели тие ќе се искачуваат само за неколку степени над нулата.

Во текот на следната седмица очекуваме наутро температурите да се спуштаат и под -10 степени, локално и до околу -15 степени. Студениот период ќе трае подолго време, судејќи според најновите ажурирања на прогностичките модели.

Свет

Елитната руска единица „Рубикон“ создаде огромни проблеми за Украина – огромна промена на фронтот

Елитната руска единица „Рубикон“ – специјализирана за електронско војување и лов на оператори на беспилотни летала – драматично го менува соодносот на силите на фронтот и ја поништува некогашната предност на Украина во дрон-операциите, пишува „Фајненшл тајмс“.

Украинските оператори на беспилотни летала, кои речиси две години им нанесуваа тешки загуби на руските сили, сега се под постојан надзор и директни напади. „Рубикон“ комбинира борбени дронови, напредни системи за електронско извидување и брза ротација на своите тимови за да ги лоцира и елиминира операторите длабоко зад линијата на фронтот – дури и до 10 километри.

„Дронот можеш да го замениш, но пилотот е незаменлив“, вели украинскиот оператор Дмитро, кој раскажува дека за влакно избегнал смрт кога руски дрон почнал да го следи над шума во близина на бојните позиции.

Појавата на „Рубикон“ предизвика остар пресврт на дигиталното бојно поле, уривајќи ја една од најсилните тактички предности на Киев. Неговата ефикасност дополнително ја притиска украинската армија, која и онака се брани од поголемите и подобро финансирани руски сили.

„Рубикон е нашиот најголем проблем“, признава Артем Карјакин, украински војник од линијата кај Покровск – стратегиски важен град што, по една година жестоки борби, е на чекор од пад.

„Да Русите немаа толку добро обучени оператори на дронови, нивната пешадија немаше да може да навлезе во градот“, додава тој. „Во моментов, да се биде оператор на беспилотно летало е исклучително опасно.“

Балкан

МПЦ–ОА донираше богослужбени материјали за македонската заедница во Тирана

Македонското друштво “Илинден”-Тирана доби верски календари за 2026 господово лето, кои бесплатно ќе бидат распределени на Македонците во Република Албанија.

Во име на Македонско друштво “Илинден“-Тирана и на Македонците голема благодарност до Македонската православна црква – Охридска Архиепископија и архиепископот г.г. Стефан што и годинава доделува одреден број верски календари за кои постои се поголем интерес меѓу Македонците.

Како друштво, веќе неколку години по ред, добиваме бесплатни верски календари од МПЦ-ОА, кои потоа им се распределуваат на Македонци во Албанија. Од мое лично име, од име на друштвото и на Македонците искажувам голема благодарност за МПЦ – ОА на поглаварот г.г. Стефан за покажаната добра волја да им подари на Македонците од Албанија дел од своите верски календари, рече Ѓурѓај за Македонски весник “Илинден”.

Додава дека интересот меѓу Македонците од година во година е се поголем и посочува дека календарите веќе се достапни а за да се добие календар треба само да се контактира со друштвото.

Свет

Орбан предупредува: Европа може да заврши во војна

Унгарскиот премиер Виктор Орбан изјави дека ризикот од ширење на војната меѓу Украина и Русија е „секојдневна можност“ поради лидерите на западните држави, кои, според него, даваат простор за про-воени наративи.

Во интервју за јавното радио, Орбан повика Европа да се „сврати кон мир, а не кон војна“. Тој нагласи дека основното прашање е што е во интерес на Европа, а неговиот одговор е – мир. Орбан посочи дека Европа треба да вложи максимални напори за стабилност и да избегне конфликт кој би можел „да ја уништи европската економија“.

Тој критикуваше земји кои, според него, „мислат дека војната е подобра од мирот“ и кои ѝ обезбедуваат на Украина оружје, пари и технологија, додека разговараат за испраќање војници.

Орбан истакна дека западните земји досега потрошиле околу 185 милијарди евра и планираат дополнителни издавања, што според него може „да ја турне Европа во долгови и да остави долгорочни последици за децата и внуците“.

Поради тоа, унгарскиот премиер истакна дека се бори „да ги оддалечи Европејците од про-воениот пат“ и да го насочи фокусот кон мирот.