„Немам кислород“ е слоганот под кој денеска, точно напладне во речиси сите помали и поголеми градови во цела Грција, но и во градови во странство се одржуваат протести поради железничката несреќа кај Темпи на крајот на февруари 2023 година, откако во јавноста излегоа нови информации од истрагата на техничкиот советник, ангажиран од семејствата на загинатите, јави дописничката на МИА од Атина.
Во железничката несреќа животот го загубија 57 лица, а според извештајот на експертот Василис Кокоцакис, дел од загинатите, околу 30 лица го преживеале сударот на патничкиот со товарниот воз, но загинале од запаливите течности, по експлозијата што резултирала со недостаток на кислород.
Паралелно беше објавен аудиозапис од телефонски повик на бројот 112 за итни случаи во кои се слушаат повиците за помош, меѓу кои и женски глас што вели „Немам кислород“, што беше и причина протестите да бидат под конкретниот слоган со цел семејствата на загинатите да побараат правда и „независно судство за сите“.
Аудиоснимките се од последните моменти на патниците од возот и според експертите, докажуваат дека дел од жртвите не загинале во сударот, туку од експлозијата што следела.
Во објавениот телефонски повик до 112, што е автоматски воспоставен откако мобилниот телефон препознал несреќа, се слуша женски глас што бара помош, вели „Не можам да дишам“, „Имам многу малку воздух“, а на крајот завршува со зборовите „Ќе умреме … Марти, те сакам“, што според медиумите во Грција, се упатени до нејзината 20-годишна пријателка што не ја преживеа несреќата.
Мајката на загинатата Марти, Мариа Каристиану, која е претседателка на Здружението на роднините на жртвите „Темпи 2023“ говорејќи за грчките медиуми посочи дека објавувањето на аудиозаписите „е начин да се изврши притисок врз истражителот да си ја заврши работата бидејќи ги знае овие работи“.
– Кога дознав дека моето дете умре, првото нешто што ми беше важно беше дали почувствува нешто или сè се случи пребрзо. Ова е важно мајката да го знае. Сите ни кажаа дека веднаш загина, а потоа дознавме дека 30 луѓе изгореле живи. Три минути нашите деца чекаа да умрат. Правдата ќе биде задоволена за овој криминал, на еден или на друг начин, посочи Каристиану за грчката телевизија „Мега“.
Протестот е организиран од Здружението на роднините на жртвите во несреќата „Темпи 2023“, а поддршка изразија од опозициските партии ПАСОК, СИРИЗА, Комунистичката партија и Нова левица, од синдикатот на вработени во јавниот сектор, од низа здруженија, како и од навивачки и анархистички групи.
Здружението на роднините на жртвите преку протестот бара веднаш да се спроведе истрага „за експлозијата на нелегалниот хемиски товар“ во товарниот вагон и „за пожарот во кој живи изгореа нашите најблиски“, како и кандидатот за претседател и до неодамна собраниски спикер Константинос Тасулас „да даде објаснувања пред неговата инаугурација на највисоката функција за закопувањето на предметите за Темпи во фиоките на Парламентот“.
Железничката несреќа се случи кусо пред полноќ на 28 февруари 2023 година во близина на месноста Темпи во централна Грција при директен судир на товарен и патнички воз кои се движеле на иста шина, а животот го загубија 57 лица, од кои поголемиот дел студенти.
Василија Петрова, фолк-пејачка од Ќустендил што гради музичка кариера во Македонија, предизвика вознемиреност во Бугарија со своето идентификување како Македонка.
„Наша пејачка, учесничка во ‘Гласот на Бугарија’, се изјасни како Македонка, пее за радикална партија“, е насловот на напис за Петрова на бугарската вебстраницата „Сигнал“, во кој „бабарогата“ е ВМРО-ДПМНЕ.
„Бугарската фолкерка и учесничка во ‘Гласот на Бугарија’, Василија Петрова, се одрече од потеклото и се изјасни како Македонка. Уметничката сè повеќе време поминува кај нашиот западен сосед, каде настапува како артист од крајно радикалната ВМРО. Партијата е позната по тоа што е против вклучување на Бугарите во Уставот на земјата.
Василиа дури и го смени пишувањето на своето име на сите социјални мрежи со Василија.
Пошироката македонска јавност ја запозна Петрова преку нејзиниот настап во емисијата „Мерак меана“ на Сител ТВ и впечатливата интерпретација на хитот „Со Господ напред“ на Војо Стојановски, со кој ја освои првата награда од публиката на фестивалот на македонската патриотска песна „Гоце фест 2004“, пренесува expres.mk
38-годишниот Емир Селимовиќ, осомничен за убиство на сопругата и синот во Калесија, уапсен е во близина на Тузла во Босна и Херцеговина, по петдневна потрага.
Припадниците на МВР на Република Српска го пронашле во селото Горња Мравица кај Прњавор, каде во четвртокот било откриено и неговото возило. Според неофицијални информации, Селимовиќ бил забележан од мештаните и веднаш ја известил полицијата, по што набрзо бил уапсен.
Телата на неговата сопруга Инела Селимовиќ (37) и нивниот тринаесетгодишен син беа пронајдени на 12 февруари во нивниот заеднички стан во Калесија. Се верува дека Емир Селимовиќ ги задавил.
По убиството, Селимовиќ побегнал со автомобил „шкода фабија“. Автомобилот подоцна бил пронајден во селото Горња Мравица кај Прњавор, но осомничениот се уште бил во бегство. Според извештаите, Селимовиќ бил виден на камерите во Челинац кај Бања Лука за време на неговото бегство.
По опсежна потрага бил лоциран и уапсен во село Горња Мравица.
Советникот во Советот на Општина Пустец од Македонска алијанса за европска интеграција (МАЕИ), Јордан Јанкула, денеска им распредели подароци и книги на македонски јазик на децата од градинките и учениците од Деветолетката „Отпорот на Горичените“ во село Долна Горица, која ги опфаќа четирите села: Горна Горица, Долна Горица, Глобочани и Туминец.
Според Јанкула „даровите за најмалите и поддршката за македонскиот јазик во Општина Пустец“ обезбедени се во рамки на успешната соработка на МАЕИ и „Патриотското друштво“ од Скопје.
Децата се израдуваа на подароците и на книгите на македонски јазик. За нив ова не е само обичен подарок, туку поттик да го негуваат својот мајчин јазик, да читаат, учат и да се гордеат со својата македонска култура и традиција, додава тој.
Јанкула посоува дека Македонци во Албанија, нивна должност е да ја зачуваат својата писменост, а со вакви акции покажуваат дека македонскиот јазик има своја иднина и меѓу младите генерации во Мала Преспа и пошироко.
Продолжуваме со вакви иницијативи, затоа што секоја книга, секој збор на македонски значи многу за нашиот идентитет, вели Јордан Јанкула.