Првиот вицепремиер и министер за животна средина и просторно планирање, Изет Меџити, на денешниот Македонски енергетски форум (МЕФ) 2025 нагласи дека енергетската транзиција не може да се реализира без еколошка правда и без јавниот интерес да биде во срцето на секоја одлука.

„Западен Балкан не може да избира помеѓу економскиот развој и заштитата на животната средина. Нам ни е потребен модел кој ги обединува двете, затоа што без чист воздух, безбедна вода и здрави екосистеми, нема ниту одржлив раст, ниту долгорочна безбедност“, изјави Меџити.

Тој посочи дека Министерството за животна средина и просторно планирање ќе остане посветен партнер во секој процес што гради иднина заснована на визија, правичност и почит кон животната средина и заедницата.

Настанот продолжува со дискусии за интеграцијата на климатските и енергетските политики, при што учествуваат бројни експерти, политичари и претставници на граѓанскиот сектор од целиот регион.

На маргините на Самитот на шефови на држави и влади што се одржува во Тирана, се отвора можност за неофицијална средба меѓу македонската претседателка Гордана Силјановска Давкова и бугарскиот претседател Румен Радев. Иако официјален состанок не е потврден, дипломатски извори не ја исклучуваат можноста за кус разговор и размена на ставови меѓу двајцата лидери.

Ова би била прва средба по одлуката на официјална Софија на Самитот на НАТО да го претставува премиерот Димитар Глечев Желјазков, наместо Радев. Се очекува на средбата, доколку се реализира, да се допре и до прашањето дали Бугарија ќе прифати поканата од претседателот на Европскиот совет, Антониу Кошта, за заедничка средба со македонската делегација во Хаг.

Во меѓувреме, премиерот Христијан Мицкоски потврди дека е во тек комуникација со Канцеларијата на Европската комисија во земјава околу иницијативата за дијалог со бугарската страна. Тој посочи дека веќе е предложен конкретен термин за состанок, но се чека потврда од Софија.

Од бугарска страна, преку изјави на министерот за надворешни работи, се пренесува ставот дека „немаат отворени прашања со Македонија“, но изразуваат сериозна загриженост за, како што велат, тонот и реториката на македонските политичари.

Засега, официјална Бугарија не открива дали е подготвена за директен политички дијалог со Скопје под покровителство на Брисел, но дипломатски извори не ја исклучуваат можноста за напредок, особено доколку се воспостави доверба и се намали политичката тензичност меѓу двете земји.

Министерот за надворешни работи и надворешна трговија, Тимчо Муцунски, информираше дека започната е евакуацијата на македонски државјани од Израел поради влошената безбедносна состојба на Блискиот Исток. На денешната прес-конференција, Муцунски соопшти дека вкупно 28 лица побарале поддршка за евакуација, а првата група — четири возрасни и четири деца — веќе е во постапка на безбеден трансфер преку Египет.

Министерството веднаш формирало кризен штаб и преку амбасадата во Тел Авив е во постојан контакт со нашите државјани. „Очекуваме првата група да биде евакуирана до крајот на денот или најдоцна утре, по што ќе следува нивно враќање во земјата со авион на Владата“, изјави Муцунски.

Втората група, според најавите, ќе замине штом се воспостави редовен авионски сообраќај од Тел Авив. Подготовките за евакуацијата ги вклучуваат и потребните документи, логистика и безбеден конвој.

Муцунски потенцираше дека македонската амбасада работи со засилен капацитет и е целосно посветена на безбедноста на граѓаните. Министерството повторно упати апел до сите државјани да се воздржат од патувања во Израел и Иран, освен ако не е апсолутно неопходно.

На крајот од обраќањето, министерот упати повик до сите засегнати страни на Блискиот Исток да го почитуваат меѓународното право и да покажат воздржаност.