Македонија

Државата за македонскиот спорт додели 440 милиони денари (ФОТО)

Република Македонија го одреди државниот буџет со кој ќе се помага спортот во новата календарска година. Утврдено е дека како средства ќе бидат распределени 440.000.000 денари, преку Министерството за спорт.

Информацијата е објавена во Службен весник, а во продолжение прочитајте ја објавата на државните органи во целост.

I. Со оваа програма се распределуваат средства за партиципација во финансирањето на субјекти-корисници од дејноста спорт: националните спортски федерации, спортските клубови, спортистите кои се натпревaруваат во индивидуалните спортови и други субјекти кои имаат решение за дејност спорт во рамки на средствата од Буџетот на Република Северна Македонија за 2025 година.

Со партиципацијата во финансирањето на односните субјекти-корисници се поттикнува развојот на македонскиот спорт во повеќе сегменти, односно: за развој на националниот систем на натпревари кој го реализираат националните спортски федерации, за остварување тренажни процеси на спортисти поединци, национални тимови и клупски екипи заради нивно учество во рамки на меѓународен систем на натпревари и учество на спортските клубови во рамки на меѓународен клупски систем на натпревари, за обезбедување услови за функционирање на органите и телата на националните спортски федерации и спортските клубови, за организација на светски, европски и регионални меѓународни спортски натпревари и традиционални спортски манифестации, за примена на науката во спортот преку вршење антрополошки мерења на спортистите од страна на јавна високообразовна установа која обезбедува наставна, научна и апликативна дејност од областа на спортот, за поттикнување на развојот на параолимпис- киот, училишниот и универзитетски спорт и спортот за лица со оштетен вид и слух, како и за поттикнување на спортската рекреација.

Средствата за реализација на оваа програма во вкупен износ од 440.000.000,00 денари ќе се обезбедат од Буџетот на Република Северна Македонија за 2025 година („Службен весник на Република Северна Македо- нија“ бр. 254/24) во Раздел 16201 – Министерство за спорт, а Министерството за спорт се определува истите да ги користи за:

2. Партиципација за финансирање на АКТИВНИТЕ СПОРТСКИ КЛУБОВИ

Средствата се наменети за партиципација во финансирањето на активностите на активните спортски клубови заради: учество во национа- лен систем на натпревари, учество во меѓународен систем на натпревари за индивидуалните олимписки и неолимписки спортови и меѓународен клупски систем на натпревари за екипните олимписки спортови (ракомет, фудбал, кошарка и одбојка), обезбедување тренажни процеси на спортисти поединци и клупски екипи, обезбедување нивна функционалност (просторни ресурси, спортска опрема и реквизити, човечки ресурси и администрирање, тренажен кадар за националните тимови, организација на натпревари, бонуси за натпреварувачите и тренерите, за примена на науката во спортот преку вршење антрополошки мерења на спортистите и обезбедување здравствена заштита, пензиско и инвалидско осигурување и осигурување од последици од несреќен случај и ризици на спортистите, за што се утврдени средства во износ од 363.880.000,00 денари.

3. Партиципација за финансирање на АКТИВНИТЕ СПОРТИСТИ ОД ИНДИВИДУАЛНИТЕ ОЛИМПИСКИ И НЕОЛИМПИСКИ СПОРТОВИ

Средствата се наменети за партиципација во финансирањето на активните спортисти од индивидуалните олимписки и неолимписки спортови заради: учество во национален и меѓународен систем на натпревари, обезбедување тренажни процеси на спортисти поединци и национални тимови, обезбедување спортска опрема и реквизити и обезбедување здравствена заштита, пензиско и инвалидско осигурување и осигурување од последици од несреќен случај и ризици на спортистите, за што се утврдени средства во износ од 10.120.000,00 денари.

4. Партиципација за финансирање на ДРУГИ ПРАВНИ ЛИЦА со решение за вршење дејност спорт (националните спортски федерации за училишен спорт, универзитетски спорт, за спортска рекреација, за слепи, за глуви, сојуз на спортски федерации).

Средствата се наменети за партиципација во финансирањето други правни лица со решение за вршење дејност спорт заради: организација на национален систем на натпревари, турнири, традиционални спортски манифестации, регионални спортски натпревари, меѓународни спортски натпревари кои се дел од календарите за натпревари на соодветните меѓународни спортски асоцијации, подготов- ки на национални тимови и спортисти поединци за нивно учество во рамки на меѓународни спортски натпревари, редовно регулирање на обврските поврзани со годишни членарини и котизации за учество на спортистите во рамки на меѓународните спортски натпревари, обезбедување нивна функционалност (просторни ресурси, спортска опрема и реквизити, човечки ресурси и администрирање, тренажен кадар за националните тимови), за примена на науката во спортот преку вршење антрополошки мерења на спортистите и обезбедување здравствена заштита, пензиско и инвалидско осигурување и осигурување од последици од несреќен случај и ризици на спортистите, за што се утврдени средства во износ од 8.800.000,00 денари.

Македонија

Мицкоски: Додека јас сум премиер, нема да никне ниту еден шатор со илегални мигранти

Премиерот Христијан Мицкоски денеска јасно го потенцираше ставот на Владата дека Македонија нема да прифати илегални мигранти и нема да дозволи поставување шатори за нив на територијата на земјата.

Повод за изјавата беа објавите на британските медиуми дека Велика Британија разгледува можност за депортирање на одбиени баратели на азил во Северна Македонија, при што секој депортиран мигрант би бил платен од британската страна. Мицкоски изјави дека со британските власти оваа тема не е разговарана и дека, доколку биде, Владата ќе ја одбие таквата опција.

„Во објавите се наведува ‘неуспешни апликанти за азил да ги праќаат во трети земји’. Да потенцирам пред македонската јавност – таква тема не е предмет на разговор, а и да биде, ќе биде одбиена од наша страна. Нашата цел е заеднички да се бориме против илегалната миграција и да ја браниме Европа“, рече Мицкоски.

Премиерот додаде дека опозицијата се обидува да го користи прашањето за мигрантите за политичка кампања, но нагласи дека борбата против илегалната миграција е фундаментална политика на ВМРО-ДПМНЕ.

Тој најави и нов проект „Безбедна држава“, инспириран од концептот „Безбеден град“, кој ќе овозможи мониторинг на македонските граници и ќе го спречи илегалниот влез, шверцот и трговијата со луѓе.

Македонија

ВЛЕН: Решени сме да ја демонтираме културата на неказнивост

По повод Меѓународниот ден против корупцијата, коалицијата ВЛЕН испрати остра и јасна порака дека овој ден не е формалност за празни изјави, туку силен аларм за „болеста“ што со години ги разградува темелите на државата.

Од ВЛЕН нагласуваат дека корупцијата не е само кршење на законот, туку предавство кон граѓаните, кражба на иднината и уништување на јавната доверба. Според нив, корупцијата не се бори со зборови или документи „за око на јавноста“, туку со храбри одлуки, чесни луѓе и целосно отфрлање на компромисите со криминалот.

„Државата не се чисти со декларации, туку со карактер. Институциите не се градат со пропаганда, туку со интегритет. А правдата не е луксуз, туку обврска“, порачуваат од ВЛЕН, истакнувајќи дека се решени да ја демонтираат културата на неказнивост и да изградат систем во кој власта не е привилегија, туку одговорност.

Во соопштението се додава дека рамнодушноста значи соучесништво, а молкот – поддршка за неправдата. „Денес не е доволно само да се осуди корупцијата, туку мора да се искорени до корен“, велат од ВЛЕН.

Коалицијата повторува дека останува непоколеблива во своите принципи: нулта толеранција кон корупцијата, нулта компромис со криминалот и нулта страв од вистината.

Македонија

Општина Битола делумно ги исплати средствата на избирачките одбори

Општина Битола ја извести јавноста за утврдената постапка и динамика за исплата на финансиските надоместоци на членовите на избирачките одбори, кои беа ангажирани за реализација на локалните избори во 2025 година.

Од секторот за односи со јавност информираат дека, во согласност со законската обврска, веќе е реализирана исплата на 25 отсто од вкупната сума од буџетот на Општина Битола. За оваа делумна исплата, претседателите на избирачките одбори се соодветно известени.

Преостанатите 75 отсто од средствата се интегрирани и предвидени во Предлог-буџетот на Општина Битола за 2026 година. Овој предлог-буџет е веќе доставен до советниците во Советот на Општина Битола и се очекува да биде изгласан пред завршувањето на тековната календарска година.

Од Општината нагласуваат дека финалната исплата на надоместоците за сите членови на избирачките одбори ќе биде реализирана во текот на првиот квартал од следната година.