Фудбалската федерација на Македонија обезбеди нова спортска опрема и вкупно 230 фудбалски топки за 23 клуба кои се натпреваруваат во сите возрасни категории во женска конкуренција, информира претседателот на ФФМ, Масар Омерагиќ.

– На секој клуб му доделивме комплети за тренинг со цел да создадеме уште подобри услови за работа и напредок на младите фудбалерки низ целата држава – рече Омерагиќ.

Тој додаде дека со оваа поддршка ФФМ дава поттик за развојот на женскиот фудбал и ја потврдува својата заложба за унапредување на спортската инфраструктура и условите за тренинг на сите клубови.

По повеќемесечна пауза поради повреда во репрезентативниот дрес на гостувањето кај Словенија, Марко Митев денеска се врати на ракометните терени. Тој настапува во дресот на Алкалоид во натпреварот против Струга во домашното првенство.

Митев е еден од најдобрите македонски ракометари, а неговото враќање е значајна вест и за македонската репрезентација, која се подготвува за настап на Европското првенство во Данска.

Наполи не успеа да ја искористи предноста на домашниот терен и одигра 0:0 против Ајнтрахт Франкфурт во натпревар од новото коло на Лигата на шампионите.

Македонскиот репрезентативец Елиф Елмас беше дел од стартниот состав и одигра цел натпревар, покажувајќи високо ниво на борбеност и ангажман на средината од теренот. Иако италијанскиот тим имаше иницијатива и создаде повеќе изгледни шанси, реализацијата овојпат целосно затаи.

Сите офанзивци на Наполи се обидуваа да го пробијат германскиот бедем, но гостите од Франкфурт успешно одолеаја до последниот свиреж. Со овој реми, Наполи пропушти прилика да се приближи кон пласман во нокаут-фазата.

Во друг натпревар од групата, Арсенал славеше убедливо на гостувањето кај Славија Прага со 0:3. Букајо Сака погоди од пенал во 32. минута, а Мерино со два гола во второто полувреме го запечати триумфот на „топџиите“.