Вчера околу 21:25 часот во СВР Скопје е пријавено дека во градскиот парк во Скопје има огномет и не се почитува одлуката на Владата за седумдневна жалост.

Веднаш е постапено од страна на полициските службеници на СВР Скопје и утврдено е дека во угостителски објект во градскиот парк била организирана роденденска прослава, при што од страна на 18-годишните М.Ф. и М.Ф., двајцата од Скопје, бил запален огнометот.

Тие се лишени од слобода и задржани во полициска станица во врска со чл 387 од КЗ, а по документирање на случајот ќе биде поднесена соодветна пријава.

Двајца засега непознати лица за полицијата синоќа по полноќ запалиле огномети на главната улица во Бутел, во близина на општинската зграда, а потоа побегнале со моторцикл.

Не е утврдено од каква националост се провокаторите.

„Фактот дека носеа капи на главите и дека тоа се случи токму пред општинската зграда и на главната улица, без страв од полицијата, покажува дека некој сака меѓуетнички проблеми и сака да нè прикаже како луѓе кои немаат сочувство за трагедијата! Тоа се монструми кои сакаат да го одвлечат вниманието од трагичниот настан кон етнички проблеми“, велат жителите Албанци од Бутел, барајќи брза реакција од полицијата за пронаоѓање на маскираните лица.

Во меѓувреме, полицијата потврдува дека е отворен случај за инцидентот и дека се работи на идентификација и апсење на двајцата осомничени.

Видеото може да го погледнете на КОХА

Општина Кисела Вода ќе донира еден милион денари за семејствата на настраданите во пожарот во Кочани. Одлуката беше донесена едногласно, на денешната вонредна седница на Советот на Општина Кисела Вода. Седницата на Советот започна со едноминутен молк во чест на загинатите во трагедијата.

„Во овие тешки моменти, нашите мисли и молитви се со семејствата на загинатите, со сите кои загубија свои најблиски, како и со повредените, на кои им посакуваме брзо закрепнување. Ова е незамислива и ненадоместлива загуба за целото општество. Во знак на сочувство и солидарност, Општина Кисела Вода донесе едногласна одлука да донира еден милион денари за семејствата на настраданите. Ова е само мал гест на поддршка, но во овие моменти е многу важно да бидеме обединети, да си помагаме и да се грижиме едни за други. Нека почиваат во мир сите што ги загубија животите, а нивните семејства нека најдат сила да ја пребродат оваа огромна болка“, изјави градоначалникот Орце Ѓорѓиевски.