Фудбалската федерација на Македонија (ФФМ) денеска официјално го започна процесот на измена на Статутот, во координација и тесна соработка со меѓународните фудбалски тела – ФИФА и УЕФА.

Работни групи составени од домашни и странски експерти веќе работат на првичната драфт верзија на новиот Статут, кој треба да донесе модерна, функционална и транспарентна организациска структура. Процесот се одвива согласно македонското законодавство и регулативите на ФИФА и УЕФА.

Од страна на УЕФА во процесот се вклучени Мариана Трандафир, Енио Боволента и Денис Бастари, додека ФИФА ја претставува Емили Дом.

Претседателот на ФФМ, Масар Омерагиќ, изјави дека ова е еден од најважните чекори за реформите што Федерацијата ги најави:

„По повеќе од 15 години, ќе добиеме нов статут, усогласен со современите стандарди и потреби. Нашата цел е да изградиме функционална и отчетна фудбалска организација на сите нивоа.“

Новиот статут се очекува да биде усвоен на почетокот на 2026 година и да го отвори патот за поголема вклученост на фудбалската заедница, транспарентност во управувањето и долгорочен развој на македонскиот фудбал.

Добрата форма на македонската фудбалска репрезентација резултираше со скок од пет позиции на најновата ранг-листа на ФИФА, каде што „црвено-жолтите“ сега се наоѓаат на 62. место.

Овој напредок доаѓа по серија позитивни настапи во изминатиот период, со што Македонија успеа да ги надмине селекциите на Албанија, Јордан, Грузија, Буркина Фасо и Обединетите Арапски Емирати. Формата и резултатите носат нова доза на оптимизам за продолжение на натпреварувачкиот циклус.

Следната шанса за дополнителен напредок ќе биде натпреварот против Лихтенштајн во рамки на квалификациите за Светското првенство, каде што избраниците на селекторот Благоја Милевски ќе се обидат да го продолжат позитивниот резултатски тренд.

На самиот врв на ранг-листата нема промени – Аргентина и понатаму е убедливо прва, пред Шпанија, Франција, Англија и Бразил.

Поранешниот НБА кошаркар Бен Меклемор (32) е осуден на осум години затвор од судот во Орегон, откако беше прогласен за виновен за сексуален напад врз девојка во алкохолизирана и полусвесна состојба. Инцидентот се случил во 2021 година на приватна забава, а обвинителството го теретеше по три точки: силување од прв степен, незаконска сексуална пенетрација и сексуален напад од втор степен.

И покрај обидите на неговата одбрана да го оспори случајот, судот ја прифати верзијата на жртвата, чие сведочење беше прикажано преку емотивно видео на изрекувањето на пресудата. Таа зборуваше за траумата и тешкотиите со кои се соочувала со години, нагласувајќи колку е тешко да се живее без чувство на правда и завршница.

По поднесената пријава во 2021 година, беше спроведена темелна полициска истрага. Обвиненијата беа официјално покренати во февруари 2024 година, а Меклемор беше уапсен два месеци подоцна. Со оваа пресуда, речиси сигурно се става крај на неговата професионална кошаркарска кариера.

Меклемор беше сметан за еден од најперспективните играчи на својата генерација. Во 2013 година беше избран како седми пик на НБА драфтот од Сакраменто Кингс, а подоцна настапуваше и за Мемфис, Хјустон, ЛА Лејкерс и Портланд. По заминувањето од НБА, кариерата ја продолжи интернационално, играјќи во Кина, Грција, Шпанија и Турција.

Последниот натпревар го одигра за турскиот клуб Меркезефенди, каде постигна 23 поени. Во текот на НБА кариерата одигра 556 натпревари со просек од 9 поени по меч.

Овој случај претставува ново потсетување за сериозноста на сексуалното насилство и неопходноста сторителите да сносат одговорност, без разлика на нивниот општествен статус или спортски успех.