Балкан

Заменикот МНР на Грција се потпиша во книгата на жалост во амбасадата во Атина

Амбасадорката Бошковска од своја страна му се заблагодари на Ловердос за поддршката и помошта од грчката Влада, но и истакна дека денешниот ден е особено тежок бидејќи родителите ги испраќаат нивните деца во вечното почивалиште.

Сочувство, но и поддршка од грчката Влада за трагедијата во Кочани, изрази заменик-министерот за надворешни работи на Грција Јанис Ловердос, кој денеска се потпиша во книгата на жалост отворена во Македонската амбасада во Атина, каде што го пречека амбасадорката Лидија Бошковска, јави дописничката на МИА од Атина.

Заменик-шефот на грчката дипломатија на амбасадорката уште еднаш ѝ ја повтори поддршката на Грција, но и практичната помош, што, како што рече дојде по телефонскиот разговор меѓу министрите за надворешни работи на двете земји Тимчо Муцунски и Јоргос Герапетритис.

– Да знаете дека Владата и народот на Грција во овие моменти на голема тага, на жал ќе бидат секогаш покрај вас. Ние, Грците сме многу чувствителен народ, имаме и ние претрпено слични трагедии, истакна заменикот МНР.

Посочи дека „некогаш зборовите се непотребни“, но и дека „за жал, многу пати трагедиите ги приближуваат народите“, а паралелно нагласи дека грчкиот народ ја чувствува тагата и сочувствува со соседната земја.

Амбасадорката Бошковска од своја страна му се заблагодари на Ловердос за поддршката и помошта од грчката Влада, но и истакна дека денешниот ден е особено тежок бидејќи родителите ги испраќаат нивните деца во вечното почивалиште.

– Би сакала да изразам голема благодарност за брзата и одлична реакција од персоналот на Службата за итна помош, на персоналот во болниците и во Солун и во Атина, на одличната соработка со грчката амбасада во Скопје. Оваа трагедија ни влијаеше на сите, истакна амбасадорката.

Дополнително, заменик-министерот побара од амбасадорката да го информира за здравствената состојба на 12-те повредени, кои се хоспитализирани во Грција.

Ловердос, се потпиша во книгата на жалост што од понеделникот е отворена во нашата Амбасада, по што имаше тет-а-тет средба со амбасадорката Бошковска.

Балкан

Албанија ја издаде првата предварителна лиценца за дигитална банка – „JET Bank“ ќе ја отвори новата ера на онлајн банкарството

Надзорниот одбор на Централната банка на Албанија донесе одлука да ѝ додели прелиминарно одобрение за лиценцирање на „JET Bank“ (Фаза I), со што официјално се отвора патот за стартување на банкарски и финансиски услуги во целост управувани по дигитален модел. Албанските медиуми пренесуваат дека ова е прва ваква дозвола издадена во земјата.

„JET Bank“ има амбиција да стане прва банка во Албанија што ќе работи исклучиво преку дигитална платформа, комбинирајќи напредни технолошки решенија со едноставни, сигурни и клиентски ориентирани услуги.

Нивната мисија е да воведат современ пристап во банкарството, насочен кон брзи трансакции, висока безбедност и максимална достапност за корисниците – без потреба од физички филијали.

Со оваа одлука, Албанија прави значаен чекор кон модернизација на финансискиот сектор и позиционирање во регионалниот тренд на дигитализација на банкарските услуги.

Балкан

Авион од Приштина слета надвор од пистата во Истанбул — сите патници евакуирани без повреди

Патнички авион на компанијата AJet, кој летал на релација Приштина–Истанбул, излета од пистата по слетување на аеродромот Sabiha Gökçen International Airport, но, за среќа, сите патници беа безбедно евакуирани и нема пријавено повредени.

Авионот — модел Boeing 737-800 со лет VF102 / TKJ76Q — по слетувањето, при рулирањето, излегол од патеката и запрел на мека земјена подлога покрај пистата. Причина, според авиокомпанијата, биле обилните врнежи кои ја направиле подлогата лизгава.

Според официјалното соопштение од Амбасадата на Република Косово во Турција, сите лица се евакуирани преку надворешни скали — без употреба на итни лизгалки — и мирно ја продолжиле својата патувачка траекторија.

Турските власти привремено ја затворија пистата каде се случи инцидентот, додека трае отстранувањето на авионот и проверка на безбедносната состојба, а надлежните институции започнаа истрага за причините што доведоа до излетувањето.

Иако настанот предизвика вонредни настани и загриженост, на крајот нема загубени животи — што е најважниот исход.

Балкан

Честитка од Македонско друштво “Илинден“-Тирана по повод празникот Свети Климент Охридски

По повод христијанскиот празник Свети Климент Охридски, македонското друштво “Илинден“-Тирана, упати честитка до Архиепископ Охридски и Македонски и на Јустиниана Прима, господин, господин Стефан и до сите Македонци каде и да се.

Од мое лично име, во име на друштвото и на сите Македонци во Албанија упатуваме честитки по повод голем христијански празник, денот на Свети Климент Охридски чудотворец – учителот и просветителот кој е доказ дека љубовта се мери според жртвата. Честитајќи им го празникот на г.г. Стефан, на членовите на Светиот архијерејски синод, на преподобното монаштво и свештенство, и на сите верници посакуваме денот посветен на патронот на МПЦ-ОА да го поминат во добро здравје, стои меѓу другото во честитката, потпишана од претседателот на друштвото Никола Ѓурѓај.

Се додава дека огромна е почитта кон Свети Климент Охридски, кој остави не само големо духовно и просветителско наследство, туку и со личен пример на дело покажа што значи милост, трудољубивост, трпение и солидарност.