Бројот на жртви од пожарот во Домот за стари лица во Тузла се искачи на 13, откако синоќа почина уште една пациентка хоспитализирана со тешки повреди.

По пожарот, во УКЦ Тузла се хоспитализирани 30 лица, а во моментов на лекување се 13 пациенти, од кои тројца се на Клиниката за анестезиологија и реанимација (еден на респиратор), шест на Клиниката за белодробни заболувања, три на Клиниката за интерни болести и еден на Клиниката за урологија.

Обдукцијата на 11 од жртвите покажала дека смртта е последица на задушување, а телото на едно лице било зафатено од огнот. Истражната комисија открила бројни пропусти: неподвижните лица биле сместени на највисоките катови, персоналот бил само тричлен за 185 корисници, а се истражуваат и финансиското работење и управувањето со установата. Директорот на Домот поднесе оставка, а причината за пожарот сè уште не е утврдена.

Земјотрес со јачина од 3,9 степени според Рихтеровата скала утрово ја погоди граничната област меѓу Црна Гора и Босна и Херцеговина, јавува РТВ.

Според податоците на Европско-медитеранскиот сеизмолошки центар (EMSC), потресот е регистриран во 08:59 часот. Епицентарот се наоѓал околу 71 километар источно-југоисточно од Сараево и 22 километри од Фоча, на длабочина од шест километри.

Во Пула беше претставен првиот електричен воз на батерии во Хрватска, изработен од компанијата КОНЧАР – Електрични возила.

Возот го реализираше своето прво тест-возење по истарската пруга, додека инженерите ги спроведуваат завршните испитувања на системот за полнење на новата батериска станица.

Овој современ воз достигнува брзина до 120 километри на час и може да помине повеќе од 200 километри со едно полнење. Според најавите, редовниот сообраќај ќе започне до крајот на следната година — чекор што ја приближува Хрватска кон позелена и помодерна железничка иднина.