Трамп стана мета на критики поради несоодветно појавување на погребот на папата Франциск: „Срам за Америка“

Американскиот претседател Доналд Трамп повторно се најде во центарот на вниманието – овојпат поради своето однесување на погребната церемонија на папата Франциск, што предизвика бурни реакции и осуди на социјалните мрежи.

Папата Франциск почина на 21 април на 88-годишна возраст. Ватикан официјално ја потврди неговата смрт преку кардиналот Кевин Фарел, кој со длабока тага соопшти дека „нашиот Свет Отец Франциск се врати во домот на Отецот, по живот исполнет со посветеност на Господ и Црквата“.

На денешната церемонија, одржана на 28 април на плоштадот Свети Петар, присуствуваа стотици илјади верници и бројни светски лидери, меѓу кои и Трамп, францускиот претседател Емануел Макрон, украинскиот лидер Володимир Зеленски и британскиот премиер Кир Стармер.

Бура на реакции поради облеката на Трамп

Трамп пристигна на церемонијата придружуван од својата сопруга Меланија, но брзо предизвика лавина од критики поради тоа што се појави во сино одело – спротивно на строго пропишаниот дрес-код кој бара темно, обично црно одело со соодветна црна вратоврска.

„Трамп е единствениот светски лидер кој не покажа почит кон папата облекувајќи црно. Срамота за Америка“, „Не само што не ставил црна вратоврска, туку и носел сино одело!“, беа само дел од реакциите на корисниците на платформите X и Instagram.

Дополнителна осуда предизвика и неговата изјава пред заминувањето од Вашингтон. Иако ја започна со зборови на почит: „Го сакаше светот, беше добар човек. Мислам дека беше одличен тип“, Трамп брзо го пренасочи разговорот кон надворешната политика и економски теми:

„Ќе биде интересно, ќе се сретнеме со многу светски лидери. Трговските договори напредуваат добро. Ситуацијата меѓу Русија и Украина се подобрува, се надеваме. И со Иран одиме во добра насока. Ќе видиме.“

Овие коментари беа дочекани со згрозеност и сарказам:

„Ве молам, нека не се обиде да склучува трговски договори на погреб!“, „Недолично.“, „Ги срами САД каде и да оди.“

Долгогодишна затегнатост со Ватикан

Историски гледано, односите меѓу Трамп и папата Франциск никогаш не биле топли. Според Дејвид Гибсон, директор на Центарот за религија и култура при Универзитетот Фордхам во Њујорк, нивниот однос бил „исполнет со тензии“, особено за време на вториот мандат на Трамп, кога неговите остри политики кон мигрантите и кратењето на меѓународната помош придонеле за натамошно заладување на односите со Светата столица.

И покрај обидот да покаже почит, Трамп повторно беше критикуван дека од настан од свет духовен и морален карактер направил политичка платформа. Белата куќа сè уште нема издадено официјален коментар на оваа тема.

Син на висока функционерка на ЦИА загина во Украина – се борел на страна на руската армија?

Централната разузнавачка агенција на САД (ЦИА) ја потврди смртта на 21-годишниот Мајкл Глос, син на заменичката директорка на ЦИА за дигитални иновации, Џулијана Галина Глос, објави NBC News.

Според информациите што ги пренесува порталот Index.hr, Мајкл се приклучил на руската војска и загинал во борбите во Украина. Американската агенција официјално ја потврди неговата смрт, но во соопштението нагласи дека станува збор за „лична семејна трагедија“ a не прашање на национална безбедност.

ЦИА: „Семејна трагедија, не безбедносна закана“

„ЦИА ја смета смртта на Мајкл Глос за приватна работа на семејството Глос. Се работи за трагичен настан, а не за безбедносно прашање“, изјави портпарол на агенцијата.

Прв ја објави веста рускиот истражувачки портал Important Stories, повикувајќи се на руски извори и профилите на Глос на социјалните мрежи. На неговиот профил на VKontakte се објавени фотографии од Црвениот плоштад и изрази на поддршка кон руската армија, како и критики кон украинската војска која ја нарекува „корумпирана“ и западните медиуми кои ги смета за „пропагандна машинерија“.

Иако ЦИА не прецизираше на чија страна учествувал младиот Глос, објавите на социјалните мрежи, како и руските извори, укажуваат дека тој можеби доброволно се приклучил на руската страна.

Во службената белешка стои – „патување низ источна Европа“

Во службената белешка на семејството Глос се наведува дека Мајкл починал „за време на патување низ источна Европа“, без конкретно да се спомнува Украина или воениот конфликт.

Мајкл бил син на Џулијана Галина Глос, висока функционерка во ЦИА, и Лери Глос, воен ветеран од Ирак кој работи на развој на воен софтвер за американската армија и НАТО.

Информациите од медиумите укажуваат дека Мајкл се идентификувал како пацифист, бил активен на протести против забраната за абортус, се борел за правата на жените и за заштита на животната средина. Сепак, по доаѓањето во Русија во 2023 година, неговиот јавен дискурс се менува – на социјалните мрежи објавувал конспиративни теории за Украина и тврдел дека НАТО бил создаден од неонацисти.

Смртта на младиот Глос предизвика бројни реакции и шпекулации – како поради неговото семејно потекло, така и поради неговата трансформација од активист во личност која изразува симпатии кон режим кој неговата земја го смета за закана.

Строг протокол на облекување за погребот на папата Франц: Бисери, црни вратоврски и симболика на боите

За верниците и светските лидери кои денес присуствуваат на погребот на папата Франц, важи прецизен дрес-код што мора строго да се почитува.

За мажите, протоколот наложува темно одело со долга црна вратоврска и црно копче на левиот ревер, додека белата кошула е дозволена. Белата боја, сепак, е строго забранета за жените.

Жените се должни да носат долга црна облека – најчесто фустан – во комбинација со црни ракавици и црн вел преку главата. Единствено, дозволениот накит се бисерите, кои според традицијата симболизираат скромност и почит.

Кога станува збор за високото свештенство, кардиналите ќе бидат облечени во виолетова хорска облека, додека бискупите и другите прелати ќе носат виолетова боја – симбол на жалост и духовно размислување. Самата погребна облека на папата Франц ќе биде во црвено, боја која во христијанската симболика претставува крвта на мачениците и присуството на Светиот Дух.

Погребот на папата ќе се одржи денес во една од петте таканаречени „папски базилики“ – базиликата Санта Марија Маџоре во Рим. Телото на поглаварот на Римокатоличката црква ќе биде пренесено од базиликата Свети Петар.

До овој момент, своето присуство го потврдиле најмалку 130 странски делегации, додека за медиумското покривање на настанот се акредитирани околу 2.700 новинари од целиот свет.