Економија

Во Дубаи има 52 регистрирани компании од Македонија

Македонски компании сè побројни во Дубаи – трговската размена достигнува 52 милиони долари

Сè повеќе македонски компании се позиционираат на пазарот на Обединетите Арапски Емирати, а само оваа година пет нови фирми од земјава станаа членки на Стопанската комора на Дубаи. Вкупниот број сега изнесува 52, што претставува годишен раст од 52 отсто, информираат од Коморите на Дубаи.

Денеска, Стопанската комора на Дубаи беше домаќин на македонска делегација предводена од премиерот Христијан Мицкоски. Од дубајска страна, делегацијата беше предводена од Султан бин Саид ал Мансури, претседател на Коморите на Дубаи – организација која ги обединува трговската, дигиталната и меѓународната комора. Двете страни разговараа за можности за продлабочување на економската соработка и отворање нови инвестиции.

Според податоците на владината прес-служба на Дубаи, трговската размена без нафта помеѓу Дубаи и Северна Македонија во 2024 година достигна 52,2 милиони долари. Во фокусот на разговорите биле новите инвестициски можности, поддршката за македонските компании и зголемување на извозот во различни сектори – од електроника, текстил и возила, до овошје и зеленчук. Од Дубаи, пак, најмногу се извезуваат електронски уреди, медицински инструменти, козметика и спортска опрема.

„Оваа посета е важен чекор напред во нашата заедничка амбиција за подобрување на економската соработка. Подготвени сме да им помогнеме на македонските компании да излезат на глобалниот пазар преку Дубаи“, изјави Ал Мансури.

За време на посетата на Абу Даби, премиерот Мицкоски оствари средба и со претседателот на ОАЕ, шеикот Мохамед бин Заед ал Нахјан. Во разговорите се дискутирало за зајакнување на билатералните односи, со акцент на економската соработка, но и на регионалните и глобалните предизвици. Шеикот потврдил дека ОАЕ останува посветена на градење партнерства со Балканот, како и на поддршка на иницијативи за мир и стабилност преку дипломатија.

Во рамките на посетата беа потпишани и два меморандума за разбирање – еден за економска соработка, а другиот меѓу македонското МНР и Дипломатската академија „Анвар Гаргаш“.

Економија

Праведната транзиција ќе успее само ако ја водиме заедно со работниците, општините, со заедниците – Божиновска на Националниот настан за Локалните економско-социјални совети

Министерката за енергетика, рударство и минерални суровини, Сања Божиновска, учествуваше на Националниот настан за вмрежување на Локалните економско-социјални совети, каде што уште еднаш ја потврди силната определба на Министерството да работи отворено, во соработка и директен дијалог со сите засегнати страни.

„ Транзицијата мора да донесе подобар живот за сите нас. А тоа е можно само ако сме отворени, достапни и ако работиме заедно. Министерството е партнер за секоја општина, секоја организација, секој работник и секоја компанија што носи иницијатива. Можете да ни се обратите во секој момент“, изјави министерката Божиновска.

Локалните економско-социјални совети – се платформа којашто ги обединува општините, синдикатите, бизнис-заедницата, граѓанските организации и институциите во процесот на праведната енергетска транзиција.

„Ако не работиме заедно, ако работниците, општините, локалниот бизнис и граѓанските организации не се во процесот – тогаш процесот нема да успее. Многу е едноставно.“ истакна Божиновска.

Божиновска се осврна и на Инвестициската платформа за праведна енергетска транзиција, која веќе функционира и создава можност за финансирање на локални проекти:

„ Со тоа се отвора реален простор за инвестиции што ќе ја придвижат транзицијата напред. Но мора, сите вклучени чинители, посебно општините, да се поодговорни, да се понудат реални издржани проекти за да ги користиме средствата ефикасно. Нашата задача е да обезбедиме јасна политичка насока, координација меѓу институциите и поддршка за квалитетни локални проекти. Ние не сакаме транзиција само на хартија. Сакам секоја општина да има шанса да развие проект, секој работник да има пристап до нови можности, а секоја заедница да почувствува дека ова е процес што создава вредност — не страв. Затоа сме тука, затоа сме отворени,“ додаде Божиновска..“

Министерството за енергетика, рударство и минерални суровини останува целосно посветено на поддршка на локалните процеси, на развој на зелени работни места, нови индустрии и стабилни услови за економски раст во сите региони

Економија

МБИ10 во пад од 0,20% при промет од 11,48 милиони денари

Изготвен од Илирика Инвестментс АД Скопје врз основа на официјални податоци од Македонска берза.

На трговската сесија од 10 декември 2025 година, индексот МБИ10 забележа пад од 0,20%, спуштајќи се на 10.219,32 поени, додека индексот ОМБ остана непроменет на 128,73 поени. Вкупниот промет изнесуваше 11,48 милиони денари, при што тргувањето беше најактивно кај Комерцијална банка, Алкалоид и Стопанска банка, кои повторно ја предводат пазарната ликвидност.

Најтргувани хартии од вредност

● Комерцијална банка АД Скопје (KMB) – 4.343.820 денари

● Алкалоид АД Скопје (ALK) – 1.969.180 денари

● Стопанска банка АД Скопје (STB) – 2.201.730 денари

Топ добитници

● Реплек АД Скопје (RPK) +0,06%

● Комерцијална банка АД Скопје (KMB) +0,07%

● НЛБ Банка АД Скопје (NLB) +0,41%

Топ губитници

● Алкалоид АД Скопје (ALK) –0,34%

● Стопанска банка АД Скопје (STB) –2,95%

● Македонски Телеком АД Скопје (TEL) –1,08%

Обврзнички пазар

На обврзничкиот пазар беше реализирана една трансакција со обврзницата за денационализација „Р. Македонија – ДЕН 22“ во вкупен износ од 638.350 денари, по цена од 94 евра, што претставува раст од 1,08%. Сите други обврзници останаа без промени во цените и без реализирани трансакции.

На берзанската сесија од 10 декември 2025 година, активноста беше умерена, со доминација на банкарскиот и фармацевтскиот сектор. Индексот МБИ10 бележи благ пад од 0,20%, при што Комерцијална банка и Алкалоид повторно беа најликвидни. Падот на Стопанска банка и Македонски Телеком имаше најголем негативен ефект врз индексот. Обврзничкиот пазар остана со ограничена активност и стабилен индекс ОМБ.

Економија

Е-фактурата ќе се тестира од 1 јануари, минимизирање на ризикот од злоупотреби

Од 1 јануари започнува пилот-фазата на проектот е-фактура, со кој се очекува да се намалат злоупотребите и фиктивните фактури, најави директорката на Управата за јавни приходи (УЈП), Елена Петрова.

Петрова појасни дека системот е усогласен со меѓународни стандарди, лесен за интеграција во компаниите и обезбедува автоматска и безбедна размена на податоци. Пилот-тестирањето ќе се одвива во контролираната средина и ќе опфати ИТ компании и економски оператори со свои системи, а до крајот на првиот квартал ќе биде достапна и апликација за помалите компании.

Целта на реформата е подобрување на управувањето со јавните финансии, поголема даночна усогласеност, намалување на сивата економија и ефикасна даночна контрола. Е-фактурата ќе овозможи реално време на издавање и примање фактури, како и документирана деловна трага за сите настани, со што се минимизира ризикот од измами.

Петрова додаде дека приоритет се и брзината на системот, заштита на податоците и автентичноста на фактурите.

На конференцијата за дигитализација на АмЧам беше истакнато дека дигитализацијата ја зајакнува владеењето на правото, ја намалува корупцијата и бара партнерство меѓу јавниот и приватниот сектор, како и инвестирање во дигитални вештини на граѓаните и компаниите.