Дури и по 16-тиот обид, косовското собрание не успеа да се конституира. На денешната седница повторно не беше формирана Комисијата за тајно гласање за избор на претседател на Парламентот. Членовите на поранешните опозициски партии не предложија членови на изборната комисија и не гласаа за составот на комисијата, што доведе до одложување на седницата.

За формирање на комисијата гласаа 55 пратеници, а еден глас беше против.

Следната седница е закажана да продолжи на 17 мај.

Поради ситуацијата во која собранието не е конституирано ниту по 16-тиот обид, а на барање на неколку политички партии, претседателот на Косово Вјоса Османи за денеска свика консултативен состанок со лидерите на партиите.

Според експертите по уставно право, претседателот може само да посредува во постигнување политички договор, но нема други овластувања, освен да го упати прашањето до Уставниот суд за решавање на моменталната ситуација.

Пред зградата на судот и обвинителството во Нови Сад утрово се собраа голем број граѓани и студенти, кои бараат ослободување на активистите на организацијата СТАВ и ПСГ, кои веќе два месеци се во притвор во затворот на Клиса, а на кои во вторникот на 13 мај им беше продолжен притворот за уште 30 дена.

На задниот влез на зградата, 50-тина вработени се обиделе да влезат во зградата, и таму се собрала исто така група граѓани, јави Н1. Тука дошло до инцидент, односно туркање меѓу припадниците на интервентната единица на полицијата, која се обидела да им овозможи на вработените да влезат, и собраните граѓани. Кога интервентната единица не успеала да им овозможи на вработените во судот да влезат, на помош им пристигнал голем број припадници на жандармеријата.

На граѓаните кои биле во првите редови им бил фрлен солзавец или бибер спреј, изјави за Н1 една студентка.

Еден граѓанин преку мегафон ѝ викал на полицијата: „Немој на голорак народ, што правите, не на мирни граѓани“.

Граѓаните извикувале „Србија“ и „Пуштете ги сите“. Една студентка преку мегафон ги предупредила граѓаните дека пристигнува полициско засилување, кое ќе им пријде на граѓаните од грб, што предизвикало немир меѓу собраните.

Шестмина активисти и студенти на опозициското Движење на слободни граѓани (ПСГ) и организацијата Студенти против авторитарна власт (СТАВ) се во притвор веќе 60 дена откако се обвинети за обид за уривање на уставниот поредок, а судот во вторникот им го продолжи притворот за уште 30 дена.

Уште шестмина активисти на СТАВ се товарат за исто дело, а тие во моментот на апсењето се наоѓале во странство, каде што се и денес.

Сите се обвинети врз основа на аудио снимка од незаконски прислушуван разговор, кој беше емитуван на режимските телевизии на 14 март. Бранителите на обвинетите во повеќе наврати тврдеа дека Безбедносно-информативната агенција (БИА) разговорот го прислушувала незаконски и додадоа дека аудио снимката не може да биде правно валиден доказ во тој процес.

Членовите на Планинската спасувачка служба (ГСС) од Сараево, по неколкудневна потрага, го пронајдоа телото на жена и утврдија дека станува збор за судија на Окружниот суд која била пријавена за исчезната на почетокот на мај. Како што објавија денес локалните медиуми, телото на судијката Аријана Љуца е пронајдено синоќа во непристапен дел од кањонот Миљачка.
.
Таа беше пријавена за исчезната на 4-ти мај, а во исто време, еден маж што живее во областа Пале исто така беше пријавен за исчезнат. Се работи за Божо Лопатиќ од Булог, а при претресот е утврдено дека двајцата исчезнале во исто време и на исто место, имено во близина на локалниот отпад за автомобили. Драган Рајиќ, командант на Цивилната заштита во општина Источни Стари Град, каде што исчезнаа Лопатиќ и Љуца, рече дека повеќе од 60 припадници на ГСС и полицијата биле вклучени во потрагата од таа страна, а по два дена потрагата ја презел ГСС на Сараевската жупанија. Нема информации за судбината на Лопатиќ. Истрагата за овој случај ја презеде Окружното обвинителство во Сараево.