Економија

Димитриеска-Кочоска на средби во ММФ: Продолжуваме со дисциплинирана фискална политика, со намалување на неформалната економија и зголемена наплата

Владата е непоколебливо посветена на имплементација на фискалната политика, дефинирана со Законот за буџети и Фискалната стратегија, а која е фокусирана на зајакнување на макроекономската стабилност. Примарна цел е постепен финансиски баланс, заштеди во државната каса и поддршка на економијата преку вложувања во инфраструктурни проекти.

Ова беше нагласено на средбата на министерката за финансии Гордана Димитриеска-Кочоска со заменик-генералниот директор на ММФ, Бо Ли, како и на состаноците со извршниот директор во Меѓународниот монетарен фонд Јерон Клик, директорот на Европскиот оддел во ММФ Алфред Камер и шефот на Мисијата на ММФ за РС Македонија Анет Кјоб, информира Министерството за финансии.

На состанокот, министерката истакна дека Буџетот се остварува според планираното, при што на приходната страна е забележан пораст на приходите во првиот квартал од 2025 година за 11,4 проценти во споредба со истиот период минатата година, додека на расходната страна растот е помал и изнесува 2,1%, со што постепено, но сигурно се движиме кон фискална консолидација. Таа додаде дека во тек се подготовки на новата Фискална стратегија за периодот 2026-2030 година и дека фокусот со новата стратегија останува на континуирана постепена фискална консолидација.

Министерката на средбите се осврна и на очекувањата за економскиот раст, којшто е проектиран на 3,7 проценти во 2025 година, при што наведе дека се следат и актуелните состојби и се земаат предвид неизвесностите на глобално ниво. “Тој ќе се темели на реализација на инвестиции, за што, рече во Буџетот, има висок износ од 47,2 милијарди денари.” Дополнително, ќе биде потпомогнат и со проектите кои се насочени кон локалниот економски развој и вложувањата во приватниот сектор. Исто така, силна поддршка, според министерката, се и странските директни инвестиции, за што наведе, дека во минатата година се реализирани рекордни 1,255 милијарди евра.

Беше истакнато дека се очекува и продолжување на надолниот тренд кај инфлацијата и нејзино стабилизирање.

На средбите беа забележани напорите за спроведување на реформи за подобрување на управувањето со јавните финансии и дека е важно да се оствари раст на приходите преку намалување на сивата економија, како и дигитализација на процесите. “РС Македонија добива значајна поддршка во спроведување на овие реформи од Меѓународниот монетарен фонд.” Тоа беше потенцирано на средбата на министерката со претставници на Одделот за фискални прашања при ММФ на која беше изразена благодарност за досегашниот развој на капацитетите во различни области од управувањето со јавните финансии преку обезбедената експертиза во клучните реформи за управување со јавните финансии. “Тоа, како што посочи министерката, е дел и од реформите поврзани со нашата ЕУ интеграција,” информира Министерството за финансии.

Средбите на министерката за финансии Гордана Димитриеска-Кочоска се реализираа во рамки на Пролетните средби на ММФ и Светска банка што оваа недела се одржуваат во Вашингтон. Министерката, покрај средбите со ММФ, оствари средби и со високи претставници на Светска банка, на Трезорот на САД, финансиски корпорации, а претходно беше во посета на македонската дијаспора во Чикаго.

Економија

Државата започна исплата на средства за овие категории на граѓани

Министерството за социјална политика, демографија и млади извести дека денеска започна исплатата на правата од социјална, детска и цивилна заштита за месец октомври 2025 година.

Користејќи дебитни картички, корисниците можат веднаш да подигнат готовина на банкоматите на банките, да вршат безготовински плаќања во продажните места или преку електронско и мобилно банкарство.

За оние корисници кои не поседуваат картички, исплатата ќе се изврши во две групи, според азбучниот распоред на презимињата. Првата група, со презимиња од А до Љ, ќе може да подигне средства денеска, 6 ноември, додека втората група, од М до Ш, ќе добие исплата утре, 7 ноември, во сите отворени филијали и експозитури на банките.

Министерството апелира до граѓаните да го почитуваат распоредот за непречено и организирано подигнување на средствата.

Економија

МБИ10 со пад од 0,23%, обврзничкиот пазар без активности

Изготвен од Илирика Инвестментс АД Скопје врз основа на официјални податоци од Македонска берза.

На трговската сесија од 6 ноември 2025 година, индексот МБИ10 бележи пад од 0,23%, спуштајќи се на ниво од 10.293,22 поени, при вкупен промет од 13,23 милиони денари. Тргувањето беше умерено, со најголем дел од активноста концентрирана кај Комерцијална банка, Алкалоид и Макпетрол, кои остануваат најликвидни хартии на официјалниот пазар. Индексот ОМБ остана непроменет на 128,27 поени, без активности на обврзничкиот пазар.

Најтргувани хартии од вредност

● Комерцијална банка АД Скопје (KMB) – 4.297.570 денари

● Алкалоид АД Скопје (ALK) – 2.296.740 денари

● Макпетрол АД Скопје (MPT) – 4.640.010 денари (вклучувајќи блок-зделка)

Топ добитници

● Нема добитници на денешната сесија на тргување

Топ губитници

● Макпетрол АД Скопје (MPT) –0,85%

● Комерцијална банка АД Скопје (KMB) –0,25%

● НЛБ Банка АД Скопје (NLB) –0,09%

Обврзнички пазар

На пазарот со државни и корпоративни обврзници не беа реализирани трансакции, при што индексот ОМБ остана стабилен на 128,27 поени.

Сесијата на 6 ноември 2025 година се одвиваше со вкупен промет од 13,2 милиони денари и пад на индексот МБИ10 од 0,23%. Најактивни беа Комерцијална банка, Алкалоид и Макпетрол, кои заедно остварија најголем дел од дневниот промет. Ценовните промени беа претежно негативни, со умерен притисок на продажната страна, додека обврзничкиот пазар остана без активности.

Економија

Божиновска меѓу енергетските лидери на P-TEC форумот во Атина – фокус на новата трансатлантска соработка

Во Атина денес официјално започна Шестото партнерство за трансатлантска енергетска соработка (P-TEC)– глобален форум што ги обединува енергетските министри од 25 земји од Европа и Северна Америка, посветен на унапредување на енергетската безбедност и стратешките инфраструктурни проекти.

По покана од американскиот секретар за енергетика Крис Рајт и грчкиот министер за енергетика Ставрос Папастравру, министерката Божиновска присуствуваше на свеченото отворање на форумот и потпишувањето на новиот договор за соработка меѓу САД и Грција.

Форумот, кој ги обединува енергетските министри од 25 земји од Европа и Северна Америка, претставува водечка платформа за дијалог за енергетската безбедност, диверзификацијата на изворите и стратешките инвестиции во регионот.

На настанот беше потпишан стратешки енергетски договор меѓу ExxonMobil, Energean и Helleniq Energy, кој предвидува 60% инвестициски удел во истражувањето на гасното подрачје „Block 2“во Јонското Море, северозападно од Крф.

Со овој потег, САД и Грција ја отворија новата фаза на билатерална енергетска соработка, вредна меѓу 50 и 100 милиони долари, насочена кон засилување на регионалната безбедност и диверзификација на европскиот пазар.

Присуството на министерката Божиновска меѓу енергетските лидери и претставници на Европската Унија, САД и регионот, беше високо забележано од домаќините, како израз на почит кон Македонија и нејзината активна улога во регионалната енергетска соработка.

Во своето обраќање, грчкиот министер за енергетика Папастравру ја спомена Северна Македонија како пример за успешна и стабилна регионална соработка, истакнувајќи дека заедничките енергетски проекти со Македонија се модел за доверба и интеграција во југоисточна Европа.

Вчера вечер, министерката Божиновска по посебна покана на новоименуваната амбасадорка на Соединетите Американски Држави во Атина, Кимберли Гилфојл, присуствуваше и на приемот во чест на американскиот секретар за енергетика Крис Рајт и секретарот за внатрешна безбедност Даг Бургам, организиран во Амбасадата на САД во Атина.

Настанот беше од висок дипломатски карактер, на кој присуствуваа американската делегација, европски министри и претставници на водечки енергетски компании, со цел зајакнување на трансатлантското партнерство и инвестициите во чиста енергија и инфраструктура.

Форумот P-TEC, кој се одржува во Zappeion Megaron, оваа година собра над 400 високи претставници од 25 држави, и потврди дека енергетската соработка меѓу Европа и САД станува стратешка оска на стабилност и развој во регионот.

Присуството на Македонија на вакви форуми е потврда дека нашата земја се движи рамноправно со европските и трансатлантските партнери во новата енергетска ера.