Врз основа на добиени информации и преземени активности во врска со натпреварот помеѓу ФК Кожуф и ФК Башкими, Одделот за безбедност и интегритет при Фудбалската федерација на Македонија (ФФМ) покренува постапка пред Дисциплинската комисија поради основано сомнение за нарушување на интегритетот на натпреварот одигран на 6. мај 2025.

Постапката се отвора против: С. Г. – ФК Кожуф, П.Г. – ФК Кожуф, Б.К. – ФК Кожуф, Б.Д. – ФК Кожуф, Ј.П. – ФК Кожуф, К.С. – ФК Кожуф, Н.С. – ФК Кожуф, Ф.К. Кожуф;

Постапката се темели на досега добиените писмени изјаснувања и доставената релевантна документација и податоци од наведените лица (тренери, фудбалери, службени лица на клубот), како и од официјалните лица на натпреварот (судии, делегат, контролор на судии, комесар за безбедност).

Во писмените, своерачни изјаснувања, дел од фудбалерите посочуваат конкретни лица за кои тврдат дека дале инструкции или наредби во врска со исходот од натпреварот.

Паралелно, Основното јавно обвинителство – Гевгелија преку Министерсто за внатрешни работи (МВР) побара доставување на целокупната документација поврзана со натпреварот од 28. коло во Втора МФЛ, заради водење на истражна постапка во рамки на своите законски надлежности.

Напоменуваме дека постапката во овој момент се однесува на наведените лица и субјекти, но истата може да биде проширена и на други лица и субјекти доколку во понатамошниот тек на постапката бидат обезбедени дополнителни сознанија или докази што упатуваат на нивна вклученост.

Случајот не е затворен и Одделот за безбедност и интегритет продолжува со активна проверка на сите релевантни аспекти поврзани со натпреварот.

ФФМ и Одделот за безбедност и интегритет остануваат цврсто посветени на заштитата на интегритетот на натпреварувањето и ќе продолжат со целосна соработка со сите надлежни институции за целосно расветлување на случајот.

Реал Мадрид во тешка позиција по Ел Класико – седум бода зад Барселона и голем број повредени играчи

Реал Мадрид не успеа да извојува позитивен резултат во големото дерби со Барселона во рамки на шпанската Ла Лига и сега заостанува седум бода зад својот најголем ривал, само три кола пред крајот на сезоната 2024/2025.

„Кралевите“ сè уште се во игра за титулата од математички аспект, но потребен им е максимален број победи во преостанатите натпревари, како и вистинско чудо – Барселона да ги загуби сите натпревари до крајот на првенството. И покрај тешката ситуација, избраниците на Карло Анчелоти најавуваат борба до последната минута.

Мисијата на Реал, сепак, е дополнително отежната поради големиот број повредени играчи. По натпреварот со Барселона, на листата на отсутни се приклучија и Винисиус Жуниор и Лукас Васкез.

Винисиус има повреда на левиот зглоб и неговата сезона е завршена. Лукас Васкез, пак, има мускулна повреда на левата нога и сигурно ќе ги пропушти дуелите со Мајорка и Севилја. Тој ќе се обиде да биде подготвен за последниот натпревар против Реал Сосиедад, каде што, според најавите, ќе се прости од навивачите и клубот, со оглед на тоа што му истекува договорот.

Покрај нив, веќе подолго време од тимот се отсутни и Антонио Рудигер, Дани Карвахал, Едер Милитао, Давид Алаба, Ферлан Менди и Едуардо Камавинга – што ја прави ситуацијата за Анчелоти уште покомплицирана.

Шпанскиот фудбалски стратег Хаби Алонсо е поставен за нов тренер на Реал Мадрид, со договор до 2028 година. Тој ќе го преземе кормилото на клубот пред почетокот на ФИФА Светското клупско првенство, кое започнува на 14 јуни 2025 година. Алонсо ќе го замени Карло Анчелоти, кој, според извори, ќе ја преземе функцијата селектор на репрезентацијата на Бразил. Оваа промена доаѓа по разочарувачката сезона на Реал Мадрид, која вклучува елиминација од Лигата на шампионите и Копа дел Реј, како и заостанување зад Барселона во Ла Лига .

Алонсо, кој претходно играше за Реал Мадрид од 2009 до 2014 година, ја започна својата тренерска кариера во Реал Сосиедад Б, а потоа се пресели во Баер Леверкузен, каде во 2024 година освои титули во Бундеслигата, Купот на Германија и Суперкупот на Германија. Неговата тактичка филозофија вклучува контрола на средината на теренот, висока пресинг игра и флексибилни формации, инспирирани од неговите искуства под водство на тренери како Пеп Гвардиола, Жозе Мурињо и Карло Анчелоти .

Со неговото враќање во Реал Мадрид, се очекува нова етапа за клубот, со акцент на модерна и динамична игра, која ќе ги искористи најдобрите таленти на тимот. Алонсо ќе донесе и нови засилувања, вклучувајќи го и Трент Александер-Арнолд, кој неодамна објави заминување од Ливерпул, како и нов лев бек и централен дефанзивец, позиции кои клубот ги смета за клучни за засилување на тимот .

Со оваа промена, Реал Мадрид се подготвува за нова ера под водство на еден од најпознатите и најпочитуваните шпански фудбалери и тренери.