Се очекува Владата во четврток да го разгледа ребалансот на годинешниот буџет, по што документот ќе оди во собраниска расправа.

Министерката за финансии, Гордана Димитриоска Кочоска, денеска изјави дека ребалансот треба да се разгледува на владина седница најверојатно во четврток. Таа додаде дека клучните економски проекции, како што се бруто домашниот производ (БДП) и инфлацијата, остануваат непроменети.

„Генерално, остануваме на истите бројки што ги имавме од аспект на БДП и инфлација“, истакна Димитриоска Кочоска по презентацијата на Договорот за финансирање на заедничките активности, што беше организирана од Министерството за финансии и Канцеларијата на ООН во Скопје.

Ново поскапување на горивата: Бензините и дизелот со повисоки цени од 17 јуни

Регулаторната комисија за енергетика, водни услуги и услуги за управување со комунален отпад (РКЕ) донесе нова одлука со која малопродажните цени на нафтените деривати се зголемуваат во просек за 1,63 отсто во однос на последната одлука од 9 јуни 2025 година.

Како што соопштуваат од РКЕ, референтните цени на нафтените деривати на светските берзи во изминатиот период бележат пораст: кај бензините за 4,09%, кај дизелот за 5,63%, кај екстра лесното масло за 5,13%, а кај мазутот за 5,69%. Дополнително, курсот на денарот во однос на американскиот долар е понизок за 0,62%, што исто така влијае врз новите пресметки на цените.

Нови цени од 17 јуни, 00:01 часот:

ЕУРОСУПЕР БС-95: 76,00 денари/литар (зголемување од 1,50 ден.)

ЕУРОСУПЕР БС-98: 78,00 денари/литар (зголемување од 1,50 ден.)

ЕУРОДИЗЕЛ (Д-Е V): 67,50 денари/литар (зголемување од 1,50 ден.)

Екстра лесно масло за домаќинство (ЕЛ-1): 67,50 денари/литар (намалување од 1,00 ден.)

Мазут М-1 НС: 39,779 денари/килограм (зголемување од 1,293 ден.)

Од Комисијата потенцираат дека објавените се максимални малопродажни цени, а трговците можат да ги формираат и пониски износите, доколку имаат можност и интерес за тоа.

„Цените се утврдени врз основа на методологијата за пресметка и движењата на референтните цени и валутниот курс. Како и досега, трговците имаат слобода да понудат пониски цени за крајните потрошувачи“, велат од РКЕ.

Регулаторната комисија ги одби енергетските проекти поврзани со семејството Заеви

Две струмички компании блиски до семејството Заеви – „Соар Енерџи Груп“ и „Ековат – Груп“ – не добија одобрение за започнување со производство на електрична енергија, и покрај тоа што ги поминале сите претходни институционални филтри, покажуваат податоци од Регулаторната комисија за енергетика (РКЕ).

Барањата на компаниите за доделување привремена лиценца беа одбиени на крајот од мај, иако биле поднесени уште минатата година со комплетна документација, а во меѓувреме биле земени високи кредити и набавена опрема.

„Соар Енерџи Груп“ – сопственост на „Тотал Инженеринг“ на Вице Заев и „Бобан Заев Холдинг“ – планирала производство на електрична енергија од три фотоцентрали во Валандово, со вкупна инсталирана моќност од околу 24 мегавати. Финансиската изложеност на компанијата во моментов изнесува 6,5 милиони евра, а ланските обврски достигнале 8,5 милиони евра.

„Ековат – Груп“ инвестирала во три фотоцентрали во селото Сушица, општина Ново Село, со вкупна моќност од 10 мегавати. Според финансиските податоци, лани направила расходи од половина милион евра, а обврските изнесувале околу 14 милиони евра. Сопствеништвото е поврзано со Симеон и Горан Крстеви – познати бизнис-соработници на семејството Заеви, а во структурата индиректно учествуваат и бугарските фирми „Грал“ и „Зунче“.

Од РКЕ за медиумите изјавија дека барањата на двете компании биле одбиени затоа што технички не било возможно приклучување на нивните капацитети на електродистрибутивната мрежа, поради потребата од претходна надградба на трафостаниците во регионот.

„РКЕ ги одби барањата за привремени лиценци бидејќи не е реализиран условот за приклучување на електродистрибутивната мрежа. Според решението за согласност, мора прво да се изврши надградба на соодветните трафостаници“, соопштија од Регулаторната комисија.

Од таму нагласуваат дека нивната одлука е конечна, но на компаниите им останува можноста да покренат управен спор пред суд. Дополнително, посочија дека поднесените барања за привремена лиценца се веќе несоодветни според новиот Закон за енергетика, кој не предвидува ваков тип лиценци.

„Ако се подобрат техничките услови и се заврши надградбата на мрежата, друштвата може да поднесат нови барања за пробна или трајна лиценца“, додаваат од РКЕ.

Познавачите на состојбите во енергетскиот сектор коментираат дека доделувањето на привремена лиценца е вообичаена постапка пред да се одобри трајна лиценца, која најчесто следи по шест месеци. Засега, од ЕВН Електродистрибуција нема одговор за конкретните услови за приклучување на двата проекта.