Тешка трагедија го потресе Прилеп, откако 64-годишниот Петар Ѓ. изврши двојно убиство и самоубиство во својот дом на улицата „Стеван Апостолоски“. Според досегашните информации од полицијата, тој по кратка расправија ги застрелал Панчо Ч. (43) и неговиот 13-годишен син Милан Ч., а потоа во престрелка со полицијата активирал рачна бомба и извршил самоубиство.

ОВР Прилеп потврдува дека против Петар Ѓ. постоела само една кривична пријава, датирана од 2002 година, за предизвикување општа опасност, откако пукал со огнено оружје во угостителски објект. Случајот тогаш не добил судска разрешница поради застареност.

Иако сограѓани сведочат дека се работело за човек со тежок карактер и конфликтно однесување, полицијата истакнува дека последните години немало официјални поплаки или пријави против него.

Оружјето со кое го извршил нападот било легално стекнато како наследство. Дозволата за поседување му била издадена во 2012 година и обновена во 2022. При увидот на местото на злосторството, полицијата пронашла траги од куршуми, две парчиња огнено оружје од калибар 9 мм и 7,65 мм, како и рачна бомба М93. Потеклото на експлозивната направа сè уште се истражува.

Полицијата пристигнала на местото на инцидентот по 21:20 часот, откако била примена првата пријава. До тој момент, не постоеле најави или предупредувања од граѓани за можен конфликт.

Жртвите беа погребани денеска на Старите градски гробишта во Прилеп, а истрагата за случајот продолжува.

Извор: МЕТА.МК

Два случаи на пијано возење беа регистрирани во Тетово во изминатите 24 часа, при што полицијата приведе двајца мажи под дејство на алкохол, информираше Министерството за внатрешни работи.

Првиот случај бил регистриран на 13 јули околу 21:50 часот на патот Гостивар-Тетово, кај наплатната станица Тетово. Полициски службеници го привеле 65-годишниот В.Б. од селото Лисец, кој управувал товарно возило „Фиат Добло“ со тетовски регистерски таблички. При алкотестирање, му биле измерени 2.06 промили алкохол во крвта.

Вториот инцидент се случил неколку часа подоцна, на 14 јули во 04:10 часот на улицата „Илинденска“ во Тетово. Полицијата го лишила од слобода 34-годишниот Ф.И. од Тетово, кој управувал патничко возило „БМВ“ со 1.67 промили алкохол во крвта.

Двајцата возачи се задржани во полициска станица, а по целосно документирање на случаите, против нив ќе бидат поднесени пријави по член 297-а од Кривичниот законик за безобѕирно управување со моторно возило.

Страшен пожар синоќа ја зафати улицата Скупи во скопската населба Злокуќани, при што изгореле шест куќи, а уште две биле зафатени од огнената стихија. Малолетно лице е повредено и итно пренесено во болница, а вкупно шестмина завршија со лекарска помош поради вдишување густ чад, информираше Министерството за внатрешни работи.

Трагедијата се случила на 13 јули околу 20 часот, а според полицијата, освен повредениот малолетник, во болница биле пренесени и Ш.С. (34), Р.С. (69), Х.Х. (49), како и тројца полициски службеници кои се обиделе да помогнат во спасувањето.

Пожарот го гаснеле екипи од Противпожарната бригада на Град Скопје, а според првичните информации, причините за избувнувањето се сè уште непознати.

Граѓаните од Злокуќани сè уште се во шок, а дел од нив останале без покрив над глава. Сцените од местото на настанот сведочат за вистински кошмар – чад, пепел и уништени домови.

Истрагата е во тек.