Русија тврди дека соборила десетици украински дронови, Киев и Одеса повторно под напад
Москва соопшти дека руските противвоздушни сили собориле десетици украински беспилотни летала над шест региони на Русија, додека во исто време беше извршен масовен руски напад со балистички ракети и дронови врз украинските градови Киев и Одеса.
Украинскиот претседател Володимир Зеленски истакна дека Русија може да биде принудена кон мир само преку засилени санкции и зголемена воена поддршка за Украина, иако не ја исклучи можноста за дипломатско решение.
„Ако претстојниот состанок не нè доближи до конкретни одлуки кои можат да ја завршат војната преку дипломатија, тогаш мора да донесеме решенија што ќе ја зајакнат нашата одбрана, ќе ги поддржат нашите воени активности или ќе го зголемат притисокот врз Русија“, изјави Зеленски.
Во меѓувреме, и покрај засилените борбени дејства, Киев и Москва спроведоа размена на првата група заробени војници помлади од 25 години. Двете страни, исто така, се договорија следната недела да извршат размена на телата на загинатите.
