Претседателот на Фудбалската федерација на Македонија, Масар Омерагиќ, упати искрени честитки и пораки за поддршка до македонските клубови кои ова лето ќе настапуваат во натпреварите од Европските купови под покровителство на УЕФА.

„Време е за европски предизвици! Од мое лично име и од име на ФФМ, им посакувам многу среќа и успех на Шкендија, Вардар, Силекс и Работнички,“ изјави Омерагиќ.

Македонските претставници се подготвени да ја претставуваат државата на европската сцена, а поддршката од ФФМ е силна и недвосмислена. Омерагиќ нагласи дека верува во квалитетот и борбеноста на македонските екипи и изрази надеж дека ќе успеат да ја подигнат репутацијата на македонскиот фудбал во Европа.

„Веруваме во вашата посветеност и спортски дух. Покажете го тоа што ве краси – тимска игра, пожртвуваност и страст,“ порача претседателот на федерацијата.

Првите натпревари од квалификациите започнуваат оваа недела, а очекувањата се дека македонските клубови ќе направат чекор напред во европските натпреварувања.

Првични наоди: Брзината ја предизвикала трагедијата во која загина Диого Жота и неговиот брат

Шпанската Цивилна гарда денеска ги соопшти првичните резултати од истрагата за сообраќајната несреќа во која животот го загубија Диого Жота, ѕвезда на Ливерпул, и неговиот брат Андре Силва, фудбалер на португалскиот клуб Пенафиел.

Според првичните наоди, несреќата ја предизвикала екстремна брзина. Спортскиот автомобил „Ламборџини Хуракан“, кој браќата го управувале на автопатот во покраината Замора, северозападна Шпанија, се движел значително над дозволената брзина, по што излетал од коловозот и се запалил. Истражителите ќе вршат дополнителни анализи, но веќе се смета дека брзината е главен фактор за трагедијата.

Несреќата се случила во ноќта меѓу 2 и 3 јули, а според извештаите, Жота бил зад воланот. Тој и неговиот 25-годишен брат починале на лице место, пред пристигнувањето на службите за итна интервенција. Автомобилот бил изнајмен, а пожарот што настанал веднаш по ударот ја отежнал и нивната идентификација.

Трагедијата доби уште посилен емотивен одек во јавноста бидејќи Жота се оженил само десет дена пред несреќата, оставајќи зад себе сопруга и три мали деца.

Погребот на браќата се одржа во саботата во нивниот роден град Гондомар, во близина на Порто, каде што илјадници навивачи, пријатели, фудбалери и членови на фудбалската заедница се собраа за да им оддадат последна почит.

Британскиот возач Ландо Норис ја израдува домашната публика со прва победа на легендарната патека Силверстоун, освојувајќи ја Големата награда на Велика Британија – 12. трка од сезоната во Формула 1.

Возачот на Мекларен ја искористи клучната грешка на својот тимски колега Оскар Пјастри при ре-стартот на трката, во услови на променливо време и дожд. Пјастри, кој водеше најголем дел од трката, не успеа правилно да го темпира забрзувањето по ре-стартот, што резултираше со казна која го чинеше победа. Норис ја искористи ситуацијата и со одлично возење финишираше прв, пред Пјастри со седум секунди разлика.

Изненадувањето на денот го приреди искусниот Нико Хулкенберг, возачот на Кик Заубер, кој стартуваше од 19-тото место, а заврши на подиумот – трет. Ова е прв подиум во неговата долга Формула 1 кариера, и тоа во 242. трка.

Актуелниот шампион Макс Верстапен, кој стартуваше од пол-позицијата, исто така направи грешка при ре-стартот и заврши на петтата позиција, зад Луис Хамилтон кој го освои четвртото место на омилената домашна патека.

Во генералниот пласман, Оскар Пјастри и понатаму е лидер со 234 бодови, но неговата предност пред Норис се стопи на само осум поени (226). Верстапен е трет со 165 бодови и се чини дека полека ја губи битката за титулата.

Следната трка на календарот е Големата награда на Белгија на 27 јули, каде се очекува нова пресметка во жестоката борба за шампионската круна.