Втората трка со бикови на прочуениот шпански фестивал Сан Фермин во Памплона заврши со сериозен инцидент – еден млад маж е избоден од бик, а уште седум лица се полесно повредени, соопштија локалните здравствени власти.

Инцидентот се случил утринава, кога еден од биковите ненадејно застанал среде трката и во неколку напнати минути почнал агресивно да ги напаѓа тркачите. 25-годишниот маж кој бил избоден во пределот под десниот пазув е префрлен во болница, каде се наоѓа во стабилна состојба и под лекарски надзор.

Преостанатите седум лица се здобиле со удари и модринки, претежно во пределот на главата и рамената, пренесуваат локалните медиуми.

Традиционалната трка, позната како „енсиеро“, претставува опасна традиција во кој борбени бикови трчаат низ тесните улици на средновековната Памплона, додека стотици учесници, облечени во бели кошули и со црвени марами, се обидуваат да трчаат покрај нив.

Фестивалот Сан Фермин, кој светската слава ја стекна благодарение на романот „Сонцето повторно изгрева“ (1926) од Ернест Хемингвеј, се одржува секој јули и трае една седмица, исполнета со музика, танци, весели процесии и обилно консумирање алкохол, но и со религиозни обреди во чест на светецот заштитник.

И покрај вниманието што секоја година го добива, фестивалот често е под лупа на јавноста поради сериозни повреди и смртни случаи. Од почетокот на водечката трка во Памплона досега животот го загубиле најмалку 16 учесници, последниот случај се случи во 2009 година.

Фестивалот и натаму останува контроверзен симбол на шпанската традиција – опасен, возбудлив и подеднакво омразен и обожуван.

Таинствена смрт на двајца руски функционери од транспортниот сектор во ист ден

Москва – Рускиот транспортен сектор се соочи со драматичен и трагичен пресврт, откако во ист ден починаа двајца високи функционери – министерот за транспорт Роман Старовојт и заменик-раководителот на Одделот за управување со имот при Федералната агенција за патишта, Андреј Корнејчук.

Според информации на неколку руски телеграм-канали блиски до безбедносните служби, 42-годишниот Корнејчук починал ненадејно во зградата на Министерството за транспорт во Москва. Сведоци тврдат дека тој се почувствувал лошо за време на состанок, се исправил, потоа се срушил и починал на лице место. Итната медицинска служба која пристигнала подоцна, само ја констатирала смртта. Првичните извештаи посочуваат на срцев удар како можно објаснување.

Само неколку часа подоцна, јавноста беше потресена од веста дека министерот за транспорт, Роман Старовојт, е пронајден мртов во своето возило во округот Одинцово, со прострелна рана. Истражниот комитет на Русија соопшти дека станува збор за самоубиство. Смртта на Старовојт дојде веднаш по објавата дека е разрешен од функцијата од страна на претседателот Владимир Путин.

Старовојт, кој беше назначен за министер за транспорт во мај 2024 година, претходно речиси пет години ја водеше Курската област, која се граничи со Украина. Неговото разрешување беше неочекувано, а не беше наведена официјална причина.

Ситуацијата се разви во момент кога рускиот транспортен сектор се соочува со сериозни предизвици – авиоиндустријата страда од недостаток на резервни делови поради санкциите, а Руските железници, најголемиот работодавач во земјата, се бори со растечки камати и инфлација, дополнително влошени од тековната војна.

Кремљ веќе именуваше нов вршител на должноста министер за транспорт – Андреј Никитин, поранешен гувернер на Новгородската област. Официјалните фотографии покажуваат како Никитин се ракува со претседателот Путин во Кремљ.

Портпаролот на Кремљ, Дмитриј Песков, изјави дека Никитин бил избран поради неговите „професионални квалитети и искуство“, кои, според претседателот, се клучни за успешно водење на еден од најважните ресори.

Според извори од индустријата, замената на Старовојт била во подготовка уште пред Меѓународниот економски форум во Санкт Петербург минатиот месец, иако Министерството за транспорт одби да го коментира тоа.

Двете смртни случаи, поврзани со истиот ресор и истиот ден, фрлаат сенка врз руската администрација, оставајќи многу прашања без одговор.

Американскиот претседател Доналд Трамп остро го критикуваше рускиот претседател Владимир Путин, нарекувајќи го одговорен за „убивање на многу луѓе“, вклучувајќи и руски војници, и најави продолжување на воената поддршка за Украина.

Говорејќи на седница на кабинетот, Трамп рече дека е „незадоволен“ од Путин и ја осуди продолжената руска агресија врз Украина. Истакна дека прекинот на огнот се покажал како потежок предизвик од очекуваното, и изрази восхит за храброста на украинските сили.

„Им ја дадовме најдобрата опрема – ракети, системи за одбрана – и тие успеаја да соборат многу цели“, изјави Трамп, додавајќи дека иако дел од неговите поддржувачи се против трошоците за Украина, тој ги препознава заслугите на украинскиот народ.

Тој додаде дека, и покрај претходно добрите односи со Путин, рускиот лидер продолжува да „фрла глупости“ и се однесува насилно. „Не се однесува добро кон луѓето – убива премногу“, рече Трамп, објаснувајќи ја одлуката за продолжување на испораките на оружје.

Изјавата доаѓа само ден откако Пентагон накратко ги замрзна испораките заради ревизија на резервите. Трамп, кој синоќа вечераше со израелскиот премиер Нетанјаху, потврди дека нови пратки ќе бидат испратени, бидејќи, како што рече: „Тие мора да бидат способни да се одбранат.“

Украинскиот претседател Володимир Зеленски претходно за ABC News изјави дека Киев смета на 20.000 ракети против беспилотни летала, потребни за одбрана од иранските дронови „Шахед“, кои Москва интензивно ги користи во нападите.