Банско, планинскиот бисер на Бугарија, од утре ќе пулсира во ритамот на џезот, откако на 1 август почнува 28-то издание на Меѓународниот џез фестивал – најреномираниот џез настан на Балканот. Оваа година, фестивалот првпат ќе трае дури десет дена, до 10 август, претворајќи го живописниот град во вистинска музичка престолнина.
Фестивалската програма ветува вистинска музичка авантура со настапи на некои од најголемите џез имиња од светската и бугарската сцена. Љубителите на жанрот ќе можат да уживаат во настапите на Џон Бисли Трио, Габриел Палачи Трио, Кетрин Расел Трио, Нилс Ландгрен Фанк Јунит, Анат Коен Квартетињо, Њујорк Војсис, Џери Бергонци, Џорџ Гарзон и многу други, кои ќе настапуваат на повеќе сцени низ градот – Главната сцена, Светската сцена, сцената „Млади таленти“ и Џез академијата.
Посебен акцент е ставен на младите музичари, со едукативни работилници и настапи на новите џез надежи, а градот ќе живее со ритамот на музиката преку концерти на отворено, џем-сесии и улични перформанси.
Бугарската џез сцена ќе биде гордо претставена од имиња како Камелија Тодорова, Христо Јоцов, Велислав Стојанов, Михаил Јосифов, Ангел Демирев и Стојан Јанкулов, заедно со бројни млади артисти кои ќе ги покажат своите таленти.
Организаторите ветуваат незаборавно фестивалско доживување, кое ќе го потврди статусот на Банско како центар на џез-културата на Балканот. Влезот на настаните традиционално останува бесплатен, што уште еднаш ја нагласува отвореноста и универзалноста на џез музиката.
