Првиот човек на судиите во ФИФА, Пјерлуиџи Колина, потврди дека на претстојното Светско првенство во САД ќе бидат воведени значајни промени во ВАР технологијата, со цел да се зголеми прецизноста на судиските одлуки и да се зачува фер-плејот.

Една од најзначајните новини е што ВАР ќе може да интервенира при можен втор жолт картон. Досега системот не се вклучуваше во ситуации поврзани со жолти картони, но од сега натаму, доколку играч веќе има жолт картон и направи прекршок што може да биде основа за втор жолт, ВАР ќе предложи преглед на ситуацијата.

Втората промена се однесува на корнерите. ВАР ќе проверува дали корнерот е правилно досуден, бидејќи во изминатите години често се случуваа голови по погрешно досудени корнери. Проверката ќе се спроведува за 10–15 секунди, без дополнително одложување на играта.

Колина истакна дека главната цел е натпреварите да се решаваат исклучиво според играта на теренот, со минимални интервенции кои не го забавуваат натпреварот.

Овие промени ќе важат само за Светското првенство во САД, по што ФИФА ќе одлучи дали ќе ги воведе во стандардниот ВАР протокол.

Доколку Македонија обезбеди пласман на Светското првенство 2026 година, нашата репрезентација ќе биде дел од групата А, заедно со селекциите на Мексико, Јужна Африка и Јужна Кореја.

Пред тоа, националниот тим се соочува со тежок предизвик – полуфинале од баражот против Данска. Во случај на победа, нашата репрезентација ќе игра со победникот од дуелот Република Ирска – Чешка во финалето на плеј-офот.

Аргентинската фудбалска легенда Лионел Меси најави дека постои можност да го пропушти Светското првенство кое ќе се одржи следното лето, нагласувајќи дека можеби ќе го следи турнирот од трибините, наместо да настапува на теренот.

„Се надевам дека ќе можам да бидам таму. Веќе реков дека би сакал да учествувам. Но, во најлош случај, ќе бидам присутен и ќе го гледам во живо, што сепак ќе биде посебно“, изјави Меси, цитиран од ESPN.

Осумкратниот добитник на „Златната топка“ ќе наполни 39 години во јуни и додава дека сѐ уште има желба за натпреварување, но возраста и физичката подготвеност можат да влијаат на неговото учество на престојниот турнир.