По катастрофалните поплави кои зафатија повеќе региони во Бугарија, претседателот Румен Радев објави дека добил понуда за помош од Република Северна Македонија, по телефонскиот разговор со претседателката Гордана Сиљановска Давкова.
„Изразувам благодарност до претседателката Гордана Сиљановска Давкова за конструктивниот разговор и за изразеното сочувство за жртвите од поплавите, како и за подготвеноста на РСМ да помогне во справувањето со последиците“, напиша Радев на платформата Икс.
Бугарија деновиве се соочува со интензивни врнежи и големи поплави, при што четири лица го загубија животот, а делови од земјата останаа без електрична енергија и со прекинат пристап до погодените области.
Во акциите за расчистување и спасување се вклучени доброволци, воени сили и социјални тимови, кои работат на нормализирање на состојбата и обезбедување помош за населението.
