Република

Проданоски: Марковите Кули ќе добијат нов сјај и ќе го издигнат Прилеп како туристички бренд

Марковите Кули, еден од најпрепознатливите симболи на Прилеп, ќе добијат современо осветлување и нов изглед што ќе ја истакне нивната историска и природна вредност – најави кандидатот за градоначалник на Прилеп, Дејан Проданоски, презентирајќи ја својата програма.

Тој објасни дека проектот предвидува целосна реконструкција на пристапните патишта и поставување уметничка илуминација која ќе биде изведена во согласност со заштитниот статус на локалитетот.

– Од 2006 година, Маркови Кули и околниот предел се под заштита како споменик на природата со исклучителни вредности. Со внимателно осмислени интервенции и паметни вложувања, може значително да се унапреди вредноста на локалитетот и туристичката понуда на градот – изјави Проданоски.

Тој додаде дека обновеното осветлување ќе биде дел од пошироката стратегија за развој на Прилеп како „Сејф Сити“, со поставување систем за видео надзор и заштита на природното и културното наследство.

– Нашата цел е Марковите Кули не само да блеснат во ново светло, туку и да станат симбол на современ туристички Прилеп – порача Проданоски.

Република

Магистралниот пат Струмица – Ново Село привремено затворен по сообраќајка

Сообраќајот на магистралниот пат А4, од Струмица кон Ново Село, е целосно прекинат поради сообраќајна несреќа.

„Од 14:10 часот сообраќајот на магистралниот пат А4, Струмица – Ново Село (пред влезот за Ново Село) е во целосен прекин поради случена сообраќајна незгода“, информираат од АМСМ.

Дополнителни детали за несреќата ќе бидат објавени од МВР во текот на денешниот или утрешниот ден.

Република

Коњановски: Џип турнеја низ Пелистер во чест на Денот на ослободувањето на Битола

Клубот „Offroad Pelister“ организираше џип турнеја низ природните убавини на Битолскиот регион, како дел од програмата за одбележување на 4 ноември – Денот на ослободувањето на Битола. Учесниците имаа можност да уживаат во предизвикувачките терени и впечатливите пејзажи на Пелистер, со што уште еднаш беше истакната туристичката и рекреативната вредност на регионот.

Градоначалникот на Битола, Тони Коњановски, истакна дека ваквите активности го промовираат активниот туризам и го приближуваат природното богатство на општината до граѓаните и посетителите. Според него, Пелистер и неговите патеки се идеален простор за љубителите на авантурите и рекреативните спортови.

Настанот привлече голем број учесници и поддржувачи, а организаторите најавуваат дека вакви турнеи ќе продолжат и во иднина, со цел дополнително зајакнување на туристичката понуда на Битола.

Република

Лишени од слобода две лица од дебарско, поднесена кривична пријава за „грабнување“ и „полов напад и силување“

ОВР Струга поднесе кривична пријава против А.Л.(26) од дебарското село Џепиште, поради постоење основи на сомнение дека ги сторил кривичните дела „грабнување“ и „полов напад и силување“, како и против Е.В.(18) од дебарското село Отишани, поради постоење основи на сомнение за сторено кривично дело „грабнување“. Тие на 06.11.2025 околу 19 часот, во село во дебарско, од куќниот двор насилно внеле 30-годишна жена во патничко возило „ауди“, кое го управувал Е.В. и се упатиле кон напуштен објект во близина на Струга, каде А.Л. физички ја нападнал, а оштетената паднала во бессознание, по што тој ја силувал.

Потоа, го повикал Е.В. и со возилото ја однеле во Општата болница во Струга. Сторителите се пронајдени и лишени од слобода, по што против нив е поднесена кривична пријава.