Скопје

Анкета: Меџити со предност од 3,3% пред Османи во Чаир, ВЛЕН води пред ДУИ

Кандидатот на ВЛЕН за општина Чаир, Изет Меџити, има предност од 3,3 проценти пред кандидатот на АКИ, Бујар Османи, покажува најновата анкета на Институтот за политички истражувања – Скопје (ИПИС), спроведена за МРТ во текот на октомври на примерок од 1.004 испитаници преку телефонско анкетирање со жители на Чаир.

Според резултатите, 27,5% од анкетираните изјавиле дека би гласале за Меџити, а 24,2% за Османи. Кандидатот Ицо Колевски добил поддршка од 1,1%, додека 47,2% се неопределени или не одговориле.

Доколку изборите се одвиваат во втор круг, 28,8% би го поддржале Меџити, а 25,4% Османи – разлика од 3,4 процентни поени. За ниту еден кандидат не би гласале 18,7% од анкетираните, а 27,1% остануваат неопределени.

Во делот на поддршката за советничките листи, ВЛЕН добива најголема доверба со 22,4%, пред АКИ со 20,3%. Поддршка за ВМРО-ДПМНЕ дале 6,1% од испитаниците, за СДСМ 1,9%, за Левица 1%, а за ЗНАМ 0,8%. Околу 20% сè уште не се определени, 13,7% нема да гласаат, а 10,7% одбиле да одговорат.

Кога станува збор за изборите за Град Скопје, 19,6% од анкетираните би гласале за кандидатот на ВМРО-ДПМНЕ, Орце Ѓорѓиевски, додека 7,6% за кандидатката на СДСМ, Каја Шукова. Над 70% се или неопределени или не би гласале.

На прашањето која партија очекуваат да победи на локалните избори, 23,2% го посочиле ВЛЕН, 19,5% АКИ, 7,8% ВМРО-ДПМНЕ, а 1,4% СДСМ.

Анкетата покажува дека етничката структура на испитаниците е 68,5% Албанци, 23,1% Македонци и 8,4% од други етнички заедници. Освен локалните прашања, граѓаните како најитен приоритет го посочиле искоренувањето на корупцијата.

Скопје

(ВИДЕО) Чистењето на Скопје во полн ек – Ѓорѓиевски апелира: Да го чуваме Скопје чисто и без отпад

Градоначалникот на Скопје, Орце Ѓорѓиевски, оцени дека акцијата за чистење на градот „72 часа“ се одвива успешно. Во активностите се вклучени повеќе од 2.500 граѓани, механизација од Градот Скопје и општествено одговорни компании.

„Сакам да апелирам до нашиот народ да се однесува одговорно кон животната средина. Несовесното одложување на отпад нема да се толерира – ќе биде казнето“, истакна Ѓорѓиевски. Тој додаде дека досега се изречени десетици казни на неколку правни субјекти, а оваа практика ќе продолжи за секој кој го загрозува здравјето и чистотата на градот.

Градоначалникот ги повика граѓаните заеднички да се вложат во зачувување на чистотата на Скопје и да го одржуваат градот како достоинствен и чист простор за живеење.

Видеото може да го погледнете тука

Скопје

Меџити: Чаир се чисти, наскоро подземни контејнери во сите населби (ВИДЕО)

Градоначалникот на Општина Чаир, Изет Меџити, најави дека општината започнала засилена акција за чистење на јавните површини, како и нов проект за поставување подземни контејнери во сите маала.

„Чаир се чисти. Многу скоро ќе бидат поставени подземни контејнери во сите населби,“ соопшти Меџити.

Со ова, општината очекува значително подобрување на хигиената, намалување на непријатните миризби и спречување на растурањето на сметот околу контејнерите.

Поставувањето на подземните системи за отпад е дел од пошироката стратегија за модернизација на урбаното уредување и подигање на квалитетот на живот на жителите на Чаир.

Видеото може да го погледнете тука

Скопје

Багери и екипи на терен: Започна расчистувањето на коритото на Вардар

Екипи на ЈП „Улици и патишта“ – Скопје деновиве спроведуваат интензивна акција за чистење на коритото на реката Вардар. Според претпријатието, ангажирана е целата расположлива механизација, а работата ќе продолжи сè додека не се заврши целосното расчистување на кејот.

Од теренските снимки и фотографии може да се забележи машинско отстранување на насобраниот кабаст и земјан материјал од централниот дел на реката, додека рачни екипи ги собираат пластичниот отпад и ситниот смет од косините.

„Во акцијата се вклучени сите екипи на ЈП ‘Улици и патишта’ Скопје со целосен работен капацитет. Ќе работиме до комплетно расчистување на просторот,“ информираа од претпријатието.

Ова чистење е дел од најавената акција за подигнување на хигиената и уредувањето на јавните површини во градот, која ја иницираше новоизбраниот градоначалник на Скопје, Орце Ѓорѓиевски. Според најавите, вакви активности ќе се реализираат и на други локации низ главниот град.