Република

Проданоски: За современ, безбеден и економски силен Прилеп

На митингот на ВМРО-ДПМНЕ во Прилеп, кандидатот за градоначалник Дејан Проданоски ја претстави својата визија за развој на градот, истакнувајќи ја важноста на историското наследство и современиот развој.

„Денес, стоиме на место каде што предците го започнаа народното востание. Нивната борба беше за слобода, а нашата борба денес е за напредок, развој и достоинствен живот тука, дома“, рече Проданоски.

Тој потенцира дека градот долго време бил маргинализиран, но со поддршка од Владата предводена од ВМРО-ДПМНЕ, веќе се реализираат инфраструктурни проекти од историско значење, како модерниот пат од Градско до Фариш и изградбата на автопатот кон Битола.

Проданоски нагласи четири клучни столбови за развој на Прилеп:

Урбана и еколошка обнова – решавање на проблемот со Градската Река, изградба на кејски ѕидови, пешачки и велосипедски патеки, нови паркови и обиколници за подобрување на сообраќајот и намалување на загадувањето.

Силна економија и нови работни места – уредување на индустриските зони „Прилеп 4“ и „Прилеп 5“, создавање услови за нови капацитети и поддршка на малите и средни претпријатија.

Квалитетен живот за сите генерации – изградба на нова детска градинка, реконструкција на училишта, спортски сали и културни институции, како и грижа за старите лица преку јавен сервис за помош и реконструкција на старскиот дом „Киро Крстески-Платник“.

Модерна, ефикасна и безбедна општина – воведување на електронски услуги за граѓаните и реализација на проектот „Safe and Smart City“ со видео надзор на клучни локации.

„Ова не е само список на проекти. Ова е наша визија за Прилеп – град кој е економски силен, зелен, безбеден и грижлив за сите жители. Град каде што младите остануваат, семејствата напредуваат, а нашите највозрасни живеат со почит“, рече Проданоски, повикувајќи ги граѓаните на партнерство во остварување на плановите.

На митингот присуствуваа претседателот на ВМРО-ДПМНЕ Христијан Мицкоски, носителката на листата на советници Билјана Кржеска, пратеници, поранешни градоначалници и членови на партијата.

Република

Битола подготвена за снегот: Обезбедени 17 милиони денари за зимско одржување

Општина Битола ќе вложи 17 милиони денари за функционирање на зимската служба во претстојната сезона. Од вкупната сума, 15 милиони денари се наменети за градежна оператива, додека два милиони денари ќе бидат искористени за индустриска сол, песок-ризла и ладна асфалтна маса.

Зимската служба ќе се реализира преку капацитетите на локалните јавни претпријатија, со можност за ангажирање дополнителна оператива доколку временските услови го наложат тоа.

Советот на Општина Битола утврди листа на приоритетни сообраќајници: 50 улици и 14 пристапни патишта до клучни институции се класифицирани како сообраќајници од прв приоритет, а 38 улици како втор приоритет. Посебно внимание е посветено на локалните патишта во руралните делови на општината.

Координативното тело за зимска служба најавува дека, доколку има потреба, од граѓаните ќе се бара соработка, а комуникацијата ќе ја води инженерот задолжен за надзор и реализација на програмата.

Република

Земјотрес го погоди западниот дел на Македонија

Рано утрово во 1:23 часот е регистриран слаб земјотрес во западниот дел на земјава, поточно во околината на Кичево, објави Европскиот медитерански сеизмолошки центар (ЕМСЦ).

Земјотресот, со јачина од 2 степени според Рихтер, се случил на длабочина од 15 километри. Според ЕМСЦ, епицентарот бил лоциран 15 километри југозападно од Кичево, додека Институтот за геолошки науки во Тирана наведува дека земјотресот бил во Општина Дебрца.

Засега нема пријавено материјални штети или други последици од земјотресот.

Република

Забрзана изградба на автопатот Тетово–Гостивар: Николоски објави ново видео од терен

Вицепремиерот и министер за транспорт и врски Александар Николовски објави ново видео на својот Фејсбук-профил, со кое информира за интензивните градежни активности на автопатот Тетово–Гостивар, дел од Коридорот 8.

Во објавата, Николовски наведува дека работата се одвива со силно темпо и дека се прават сериозни чекори кон комплетирање на автопатското решение на овој стратешки коридор.

„Интензивно се работи на автопатот Тетово – Гостивар. Силна динамика во комплетирањето на автопатското решение на Коридорот 8. Ја градиме Македонија“, напиша министерот, додавајќи видео снимки од градежните машини и текот на работите.

Инфраструктурниот проект е еден од клучните сегменти во модернизацијата на патната мрежа во земјата и значајно ќе го подобри движењето меѓу Полошкиот регион и западниот дел на Македонија.