Шест лица загинаа, а четворица се повредени во тешка несреќа кај Бургас, Бугарија, откако автомобил со мигранти слета во езерото Ваја за време на полициска потера. Возилото било регистрирано во Романија, а го управувал државјанин на Романија, пренесува Euronews.

Според извештаите, во автомобилот „Шкода“ се превезувале вкупно 10 лица. Преживеаните изјавиле дека се од Авганистан.

Потерата започнала околу 21:20 часот, кога полициска патрола забележала возило кое се движело со екстремна брзина и опасно маневрирало. И покрај дадените сигнали за запирање, возачот продолжил да бега и во два наврати го менувал правецот за да го избегне полициското блокирање.

Полицијата поставила двоен контролен пункт во близина на Бургас и се обидела да го сопре возилото со поставување шилци на патот. Возачот, меѓутоа, се движел многу блиску зад друго возило за да го оневозможи нивното користење, па дури и го удрил тој автомобил, изјавил заменик-министерот за внатрешни работи Ивајло Златанов.

По кратко време, возилото излетало од патот и паднало во езерото Ваја.

На местото пристигнале спасувачки екипи, но шест лица починале. Четворица преживеале, меѓу кои и возачот, и тие се пренесени во болница.

Според бугарските власти, ова е уште еден случај кој укажува на зголемениот ризик и трагичните последици од шверцот на мигранти и избегнувањето полициски контроли.

Српските безбедносни служби трагаат по двајца снајперисти кои, според информациите, можеле да имаат за цел директен напад врз претседателот Александар Вучиќ или предизвикување вооружен инцидент за време на протести.

Игор Бечиќ, пратеник од СНС и претседател на Комисијата за контрола на безбедносните служби, изјави дека во разузнавачките кругови не е исклучена можноста вклученост на „Кавачки клан“ во планирањето и логистиката, бидејќи претходно членови на кланот биле поврзувани со планови за атентат врз Вучиќ.

Претседателот Вучиќ потврди дека снајперистите се во Белград веќе три дена, а службите се во потрага по нив. Тие се добро финансирани, а идентитетот и целите на напаѓачите засега не се објавени.

Бројот на жртви од пожарот во Домот за стари лица во Тузла се искачи на 13, откако синоќа почина уште една пациентка хоспитализирана со тешки повреди.

По пожарот, во УКЦ Тузла се хоспитализирани 30 лица, а во моментов на лекување се 13 пациенти, од кои тројца се на Клиниката за анестезиологија и реанимација (еден на респиратор), шест на Клиниката за белодробни заболувања, три на Клиниката за интерни болести и еден на Клиниката за урологија.

Обдукцијата на 11 од жртвите покажала дека смртта е последица на задушување, а телото на едно лице било зафатено од огнот. Истражната комисија открила бројни пропусти: неподвижните лица биле сместени на највисоките катови, персоналот бил само тричлен за 185 корисници, а се истражуваат и финансиското работење и управувањето со установата. Директорот на Домот поднесе оставка, а причината за пожарот сè уште не е утврдена.