Балкан

Ќе се гради авантуристички парк во Студено, област Голо Брдо, нов чекор за туристичко оживување на областа

Во срцето на недопрената природа, во селото Студено — административна единица Стеблево, област Голо Брдо — наскоро ќе започне изградбата на авантуристички парк, проект што има за цел да ја претвори оваа област во современа туристичка дестинација за љубителите на адреналин, природа и уникатни искуства.

Проектот, поддржан од Општина Либражд, предвидува создавање на авантуристички комплекс со повеќе атракции: „зип лајн“ над езерото Студено, панорамски балкон со поглед кон долината, астрономска опсерваторија и специјализирани патеки за планинарење и истражување. Со ова, Студено се позиционира како една од најатрактивните дестинации за авантуристички туризам во Албанија, објави МИА.

Според весникот „Илинден“, проектот опфаќа и изградба на „Виа Ферата“ — безбедна планинарска патека за искачување што ќе им овозможи на посетителите да ги истражуваат карпестите формации во различни нивоа на тежина, прилагодени за почетници и искусни алпинисти. Сите траси ќе бидат уредени во согласност со природниот релјеф и пејзажот.

Една од највозбудливите атракции ќе биде „Зип лајн“ линијата што ќе минува над езерото Студено, нудејќи незаборавно воздушно искуство и спектакуларен поглед кон планините на Голо Брдо. Дополнително, ќе се изгради и авантуристички парк со висечки мостови, јажиња и спортски зони, како и зимско лизгалиште.

Особено внимание ќе биде посветено на Астрономската опсерваторија, која ќе служи како центар за набљудување на ѕвезди и развој на астротуризмот. Во соработка со локалната заедница, се планира и одржување на Фестивал на астротуризам, со цел промоција на чистото небо и природните убавини на Студено.

Претставници на административната единица изјавија за албанските медиуми дека местото, кое до неодамна било малку познато, денес привлекува се повеќе туристи од странство. Во 2024 година, селото Студено се вброи меѓу најпосетуваните дестинации во Албанија — со над 100.000 посетители кои ја истражувале недопрената природа во рамките на Националниот парк Шебеник–Јабланица.

Стеблево е едно од 22-те населени места во областа Голо Брдо, каде што мнозинството население е од македонско потекло. Пред територијалната реформа во 2014 година, Стеблево беше самостојна општина, а денес административно припаѓа на Општина Либражд. Другите две поранешни општини, Требиште и Острени, се во состав на Општина Булќиза.

Балкан

Хрватска подготвува целосна забрана на мобилните телефони во основните училишта

Во Хрватска се подготвува нова регулатива со која целосно ќе се забрани употребата на мобилни телефони во основните училишта, како за време на часовите така и за време на одморите. Ова го најави министерот за образование Радован Фукс, кој истакна дека целта е подобрување на концентрацијата, дисциплината и комуникацијата меѓу учениците.

Фукс појасни дека во средните училишта забраната нема да биде толку строга, бидејќи постарите ученици повеќе зависат од дигитални алатки во наставата. Сепак, телефони нема да смеат да се користат на час, освен ако наставникот не ги вклучи во наставниот процес.

Министерот најави и можни пошироки законски решенија кои би го ограничиле користењето на мобилни телефони кај малолетници по примерот на регулативите за алкохол и цигари, но додаде дека за тоа е потребен поширок општествен договор.

Тој посочи дека проблемот не е само во уредите, туку и во прекумерната употреба на социјални мрежи, што може да влијае на менталното здравје на децата. „Ограничувањата постојат, но родителите се тие кои мора активно да ги следат“, рече Фукс.

Најавени се и измени во правилата за оправдување на изостаноци, поради голем пораст на оправдани отсуства во периоди на тестирање. Се разгледува можност родителите да можат да оправдаат отсуство само два до три пати по полугодие, додека за останатите ќе се бара медицинска потврда.

Фукс се осврна и на зголеменото врсничко насилство надвор од училишните простории, нагласувајќи дека е потребна координирана реакција на училиштата, социјалните служби, здравството и полицијата. Според него, само заеднички пристап може да спречи ескалација на ваквите случаи.

Балкан

Албанија заплени 25 тони пченка поради канцероген токсин

Албанските власти запленија 25 тони пченка увезена од Србија, откако лабораториските тестови покажале опасно високи нивоа на афлатоксин – токсин кој се создава во мувлосани житарици и е познат како канцероген.

Од тамошната Агенција за безбедност на храна соопштија дека пратката е стопирана на граница и нема да биде пуштена во употреба.

Стручњаците предупредуваат дека афлатоксинот претставува сериозен ризик не само за добитокот, туку и за луѓето доколку преку храната влезе во синџирот на исхрана.

Албанските инспекции најавуваат зајакнати контроли на сите пратки на жита и сточна храна што пристигнуваат во земјата.

Балкан

Трагедија на патот: Еден мртов, осум повредени по судар автобус–автомобил

На 09.11.2025, околу 5:45 часот наутро, се случи сериозна сообраќајна несреќа на патот во близина на Обреновац, Србија, кога патничко возило се судри со автобус. Во несреќата загина возачот на автомобилот, а осум лица се повредени, од кои едно со тешки телесни повреди.

На терен интервенираа три екипи на брзата помош, додека сообраќајот на делот од патот се одвива наизменично по една лента. Полицијата го врши увидот и истрагата е во тек за да се утврдат причините за трагедијата.