Руски војници на границата со Естонија – еве што се случува

Естонскиот министер за надворешни работи, Маргус Цакна, изјави дека ситуацијата на границата со Русија е „под контрола“ и дека извештаите за напнатост се преценети.

Ден претходно, на дел од естонски пат кој кратко минува низ руска територија, беа забележани седум маскирани и вооружени руски војници. Патот, познат како „Saatse Boot“, долг околу еден километар, привремено беше затворен за сообраќај за да се избегнат инциденти. Локалните жители сè уште можат да го користат патот без застанување, но се планира долгорочно да се користи алтернативна рута која целосно заобиколува руска територија.

Министерот Цакна нагласи дека, и покрај појачаната активност, не постои непосредна закана. Естонските власти ја оценуваат појавата како можна провокација, а западни аналитичари сметаат дека инцидентот е дел од пошироки хибридни активности на Русија, како нарушување на GPS сигналите и воздушни упади. Сепак, засега нема знаци на ескалација.