Потпретседателот на САД, Џеј Ди Венс, изјави дека американскиот претседател Доналд Трамп сè уште нема донесено одлука дали ќе ѝ испрати ракети од типот „томахавк“ на Украина.
Според него, Вашингтон и понатаму ги анализира можностите за испорака на оружје кон Киев, но Трамп, пред сè, настојува да ги заштити интересите на САД.
„Потребни ни се клучни системи за нашите вооружени сили. На тоа е фокусиран претседателот“, рече Венс.
Во последните недели имаше сигнали дека Трамп можеби се повлекува од притисокот врз Киев за брз мировен договор со Москва. Но, според „Ројтерс“, последните разговори укажуваат дека повторно размислува за можноста за договор — дури и по услови неприфатливи за Украина.
Извори наведуваат дека американските официјални лица во разговорите со Зеленски ја споменале идејата за територијална размена меѓу Украина и Русија, што ја предложил Путин во телефонски разговор со Трамп: Украина би ги предала регионите Донецк и Луганск, а би добила помали делови од Запорожје и Херсон.
Украинската страна го оцени предлогот како „политичко самоубиство“, бидејќи деловите на Донецк и Луганск што сè уште ги контролира Киев имаат клучно стратешко значење.
На состанокот, кој се одржа во петок во Белата куќа, Трамп — според изворите — одбил да ѝ обезбеди на Украина ракети „томахавк“ и предложил прекин на огнот долж постојната линија на фронтот, што подоцна Зеленски го прифатил во своето обраќање до новинарите.
Трамп изјавил дека не бара Украина да ја предаде целата област Донбас, додавајќи:
„Нека остане како што е. Сметам дека околу 78 проценти од територијата веќе е под руска контрола. Некои работи можат да се преговараат подоцна.“
Истовремено, Трамп најави дека наскоро ќе се сретне со рускиот претседател Владимир Путин во Будимпешта, а американскиот државен секретар Марко Рубио ќе одржи подготвителен состанок со рускиот министер за надворешни работи Сергеј Лавров во наредните денови.
Украинската делегација го оцени средбата како „разочарувачка“, а аналитичарите предупредуваат дека судбината на Украина сè повеќе зависи од Трамповите лични одлуки и контактите со Путин.
