Премиерот Христијан Мицкоски, кој ја предводи македонската владина делегација на Самитот за Западен Балкан во рамки на Берлинскиот процес во Лондон, оствари тет-а-тет средба со британскиот премиер Кир Стармер.
Како што соопшти Мицкоски, разговорот бил фокусиран на унапредување на билатералните односи меѓу двете земји, поддршката на Обединетото Кралство за европската перспектива на регионот, како и на можностите за продлабочување на економската соработка.
„Со премиерот Стармер разговаравме за зајакнување на партнерството меѓу нашите земји и за конкретни иницијативи што ќе придонесат за стабилност и развој на Западен Балкан“, наведе Мицкоски.
Средбата се одржа на маргините на Самитот, кој обединува лидери од регионот и од Европската унија со цел поттикнување на интеграциите и економската поврзаност на земјите од Западен Балкан.
