Детали од средбата меѓу американскиот претседател Доналд Трамп и украинскиот лидер Володимир Зеленски, одржана кон крајот на минатата недела, откриваат затегната атмосфера и отфрлање на украинските барања. Според изворите на Фајненшл тајмс (FT), Трамп бил видливо изнервиран од разговорите и дури ги фрлил картите од бојното поле што му ги презентирал Зеленски, изјавувајќи дека е „уморен од гледање на мапи и линии“.
Американскиот претседател, наводно, му рекол на Зеленски дека нема да испрати ракети „Томахавк“ во Украина, и извршил притисок тој да ги прифати условите што рускиот претседател Владимир Путин ги предложил за прекин на војната. Изворите на FT тврдат дека тие услови фактички значат украинска капитулација и повлекување од преостанатите територии во Донбас.
„Ако не го потпишеш тоа, ќе бидеш уништен“, наводно му рекол Трамп на Зеленски, предупредувајќи го дека Украина ја губи војната. Притоа, ја пофалил руската економија како „во одлична состојба“ и повторил дел од пораките што Путин му ги пренел претходниот ден.
Во јавниот дел од средбата, Трамп веќе најави дека нема да ја исполни испораката на „Томахавк“ ракети, велејќи дека „на САД им се потребни за свои потреби“.
Според FT, Зеленски ја напуштил средбата „крајно незадоволен“, бидејќи очекувал американска воена поддршка што ќе му овозможи посилна позиција во евентуалните мировни преговори со Москва.
