Две лица се уапсени откако повеќе патници вечерва беа избодени во воз кон Кембриџшир, соопшти британската сообраќајна полиција, а пренесува BBC.
Инцидентот се случил во воз на Лондонската североисточна железница (LNER) за Хантингдон. На местото на настанот интервенирале повеќе од 30 вооружени полицајци, по повикот на итните служби.
Сè уште не се објавени детали за бројот на избодени лица или сериозноста на повредите, но портпаролот на Итната помош на Источна Англија потврди дека повеќе пациенти биле пренесени во болница.
„Имаше голема мобилизација на железничката станица во Хантингдон, која вклучуваше бројни амбулантни возила, тактички команданти, тим за опасни области и тимови за критична нега, вклучувајќи и воздушна итна помош“, изјави за BBC.
На X (поранешен Twitter) градоначалникот на Кембриџшир и Питерборо, Пол Бристоу, го коментираше инцидентот:
„Слушам извештаи за страшни сцени во возот во Хантингдон, Кембриџшир. Полицијата е на местото на настанот и две лица се уапсени“, напиша тој.
Британскиот премиер Кир Стармер изјави дека инцидентот е „длабоко загрижувачки“.
„Страшен инцидент во возот во близина на Хантингдон е длабоко загрижувачки. Моите мисли се со сите погодени, а им благодарам на итните служби за нивната реакција. Секој во тој регион треба да ги следи советите на полицијата“, објави Стармер.
