Магазин

Бејби Фуд Фактори ја започнува платформата „Здрава исхрана од мали нозе“

Сеопфатна иницијатива за општествена одговорност посветена на превенција на детската дебелина

Скопје, 6 ноември 2025 – Бејби Фуд Фактори, членка на групацијата Нелт и производител на брендот Нутрино, како водечка компанија во производството на здрава храна за сите генерации, ја започна уникатната општествено одговорна иницијатива „Здрава исхрана од мали нозе“, со цел превенција на детската дебелина и подигање на свеста за значењето на правилната исхрана од најрана возраст.

Раната едукација – клучна за долгорочно здравје

Платформата е осмислена како одговор на сериозните здравствени предизвици на денешницата, со фокус на едукација на родителите и стручњаците, но и создавање на долгорочна промена преку знаење, превенција и одговорност. Според извештајот на Светската здравствена организација, секое трето дете во Европа има вишок килограми или е со прекумерна тежина, а слична статистика се бележи и во Србија и регионот. Според податоците на Републичкиот завод за статистика и Институтот Батут, речиси 13% од децата на возраст од 5 до 14 години се дебели, 16,6% се со прекумерна тежина, а проекциите покажуваат дека до 2030 година повеќе од 18% од децата на возраст од 5 до 19 години ќе имаат проблем со дебелина.

Брендот Nutrino за поздрави генерации на деца

Истражувањата покажуваат дека навиките во исхраната се формираат до петтата година од животот, што ја прави раната едукација клучна за долгорочното здравје. Токму затоа, преку оваа сеопфатна иницијатива за општествена одговорност, брендот Нутрино за првпат во Србија ги поврзува стручната јавност и родителите, преку заедничко делување кон поздраво растење на идните генерации, со поддршка на групацијата Нелт.

По тој повод, денес во Сава центарот беа организирани два стручни панела — „Превенција на дебелината кај децата: значењето на првите 1000 дена“ и „Од првата кашичка до здрави навики: како сите заедно градиме здрава генерација“, како и стручно предавање на тема „Јавно-здравствена перспектива на проблемот со прекумерната телесна тежина и дебелината“, одржано од д-р Драгана Атанасијевиќ, специјалист по социјална медицина, MSc.

Поддршка од стручњаци во Србија, Босна и Херцеговина, Северна Македонија и Црна Гора преку панели и тркалезни маси

На првиот панел, „Превенција на дебелината кај децата: значењето на првите 1000 дена“, д-р Душанка Новосел, проф. д-р Аспазија Софијанова и прим. д-р Снежана Лешовиќ зборуваа за клучното значење на раниот развој, правилната исхрана и поддршката на родителите при формирање на здрави навики од најраната возраст.

Марина Булут, извршна директорка на Бејби Фуд Фактори, д-р Иван Миловановиќ, проф. д-р Снијежана Хасанбеговиќ и д-р Драгана Атанасијевиќ беа учесници на вториот панел, „Од првата кашичка до здрави навики: како сите заедно градиме здрава генерација“, на кој се разговараше за соработката меѓу стручњаците, производителите и институциите во заедничката цел – создавање поздрави генерации и менување на загрижувачката статистика за детската дебелина.

Извршната директорка на компанијата BFF, Марина Булут, ја истакна важноста на заедничкото делување: „Овие бројки се повик за акција. Како лидер на пазарот на детска храна, Нутрино има позиција да биде двигател на позитивни промени во исхраната на најмладите и да ги постави темелите на здравите навики уште од најрана возраст. Превенцијата на детската дебелина мора да стане заеднички приоритет — не само на родителите и здравствените работници, туку и на сите општествено одговорни компании. Веруваме дека знаењето, поддршката и навремената едукација можат да направат вистинска разлика во животите на децата. Со оваа иницијатива започнуваме ново поглавје од нашата мисија — да го поттикнеме воведувањето на здрави навики, да ја поврземе науката и заедницата и да придонесеме за иднина во која секое дете расте здраво, силно и среќно.“

Нутрино како сојузник во растењето на здравата генерација

CSR иницијативата на Нутрино, „Здрава исхрана од мали нозе“, претставува чекор кон поздраво општество и долгорочна промена што ги надминува границите на пазарната комуникација и се темели на доверба, знаење и вистинска поддршка на заедницата. Како пионер во ваквиот пристап, компанијата Baby Food Factory и брендот Нутрино поставуваат нови стандарди на општествено одговорно дејствување, ставајќи го здравјето на децата, преку систематска и континуирана едукација, во прв план.

Магазин

CNN: Сè уште постои една прекрасна јужноевропска земја со вкусна храна, одлично вино и без туристи

Престижниот американски медиум CNN во обемна репортажа ја постави Македонија на мапата како една од последните неистражени дестинации во Јужна Европа – земја со исклучителна храна, врвно вино и речиси без туристички метеж.

Во текстот, Македонија е опишана како „пат помалку патуван“ каде драматичниот планински релјеф, слоевитата историја и искреното гостопримство создаваат уникатно културно и природно искуство. Лоцирана северно од Грција, земјата е наречена една од најпланинските во светот – каде „кога и да тргнеш, пред тебе и зад тебе има планина“.

И покрај тоа што по големина ѝ е слична на американската сојузна држава Вермонт, Македонија сè уште ги избегнува гужвите што се типични за популарните јужноевропски дестинации. Според локалните туристички работници, голем број патници само транзитираат низ земјата без да ги откријат нејзините потенцијали.

CNN ги издвојува духовните светилишта како Бигорскиот манастир и манастирот Свети Наум, а Охридското Езеро го нарекува „круниски дијамант“ со богат биодиверзитет и препознатливиот охридски бисер.

Гастрономијата е претставена како централно доживување – од „вонземски“ зеленчук произведен на мали семејни фарми, до традиционални специјалитети како ајвар, ракија, бурек, пастрмалија и тиквешките вина. Кафаната, како институција, е опишана како жив доказ за македонската традиција и културна издржливост.

Скопје се истакнува како град на контрасти со бруталистичка архитектура, османлиски дух во Старата чаршија и модерни градби, додека за авантуристите се препорачуваат Водно и кањонот Матка.

CNN заклучува дека Македонија нуди „повеќеслојно рурално искуство и едни од најубавите природни пејзажи што може да се видат во толку мала земја“, охрабрувајќи го светот да го открие овој балкански бисер пред да го преплават туристи.

Извор: 4news.mk

Магазин

„Stranger Things“ руши рекорди: Петтата сезона има 59,6 милиони прегледи во првите пет дена

Првиот дел од долгоочекуваната петта сезона на „Stranger Things“ беше објавен на 26 ноември, а веќе во првите пет дена оствари импресивни 59,6 милиони прегледи. Според пишувањето на Variety, ова е најдобриот старт што некогаш го имала серија на англиски јазик на платформата Netflix.

Овој резултат претставува значително надминување на веќе високата гледаност на четвртата сезона. Во 2022 година, кога Netflix сè уште ја мереше гледаноста според вкупно поминати часови, серијата во првите три дена собра 287 милиони часови гледање – бројка која се пресметува околу 22 милиони прегледи. Тоа дополнително го потенцира огромниот интерес што го привлече новата сезона.

Нови рекорди уште од премиерата

Иако петтата сезона е објавена пред само неколку дена, веќе донесе втор рекорд. Поради големото исчекување, сите четири претходни сезони минатата недела се најдоа меѓу Топ 10 најгледани на Netflix – првпат една серија да има четири сезони истовремено на листата.

Но, рекордите не застанаа тука. Во периодот од 24 до 30 ноември, „Stranger Things“ стана првата серија со пет сезони во Топ 10:
– петтата сезона го зазеде првото место,
– првата сезона беше трета со 8,9 милиони прегледи,
– четвратата сезона петта со 6,1 милиони,
– втората сезона шеста со 5,6 милиони,
– третата сезона осма со 4,6 милиони прегледи.

Финалето доаѓа на самиот крај од годината

Netflix минатата недела ги објави првите четири епизоди од новата сезона, а наредните три ќе бидат достапни за гледање на католички Божиќ, a големото финале е планирано за Нова година.

Со оглед на огромната гледаност и интересот што не се намалува, се очекува „Stranger Things“ уште долго да остане меѓу најпопуларните на Netflix. Проекциите се дека петтата сезона ќе се најде и на листата на најгледани серии на англиски јазик на сите времиња, каде моментално четвртата сезона е на третото место со 140,7 милиони прегледи во првите 91 ден.

Магазин

Како изгледаше во Тетово Сејф сити во 60тите

На оваа стара фотографија се гледа милиционер кој го сопира возилото на улиците на Тетово. Сцената ја прикажува секојдневната работа на органите на редот во градот во минатото, кога контролата на сообраќајот и безбедноста беа извршувани на традиционален начин, без модерни технолошки системи.