Новиот градоначалник на Град Скопје, Орце Ѓорѓиевски, денеска официјално го презеде уверението за функцијата, истакнувајќи дека му претстои обврска да работи одговорно и посветено во интерес на сите граѓани.
– Денешното уверение е симбол на довербата што ми ја дадоа скопјани. Благодарен сум за секоја поддршка и за секој кој препозна искреност и дела зад зборовите. Ќе бидам градоначалник на сите, без разлика на припадност. Поделбите за мене не постојат, порача Ѓорѓиевски.
Тој најави дека уште вечерва во 20:30 часот ќе започне првата голема акција – генерално чистење на градот во рок од 72 часа, согласно неговото предизборно ветување.
– Скопје го менуваме од корен. Веднаш почнуваме со чистење, а утре со темелна реорганизација на јавните претпријатија, за да почнат да функционираат нормално и ефикасно, истакна градоначалникот.
Ѓорѓиевски најави и започнување на нови проекти во инфраструктурата, образованието, спортот и животната средина, како и воспоставување на зголемена транспарентност во работењето на Градот.
– Скопје конечно ќе биде отворен град. Почнуваме, порача тој.
