Република

Повторно одложено рочиштето за случајот на родилката од Дебар: Судот ќе закажува расправи секој ден за да не застари предметот

Судскиот процес за случајот со родилката Јилдз Веапоска од Дебар повторно беше одложен денеска во Основниот суд во Струга, поради оправдано отсуство на бранителот на првообвинетиот лекар. На ова рочиште требаше да биде презентиран извештајот од супервештачењето.

На претходното рочиште, бранителот бараше изземање на судечкиот судија и претседателите на судовите во Струга и Битола, по што предметот беше разгледуван во Врховниот суд и вратен назад во Струга. Но, и ова закажано рочиште не се одржа, бидејќи адвокатот доставил доказ дека присуствува на притворски предмет во Основниот суд во Битола.

Судечкиот судија Јордан Јованов истакна дека нема основ за присилни мерки, бидејќи отсуството е оправдано, но предупреди дека предметот е во ризик да застари.

„Овој случај е итен исто како и сите други. Затоа, доколку има ново одлагање, рочиштата ќе се закажуваат секој нареден работен ден. Нема повеќе паузи од недели и месеци,“ рече Јованов.

Адвокатот на оштетената, Сашо Јанев, оцени дека ваквите одлагања се обид да се доведе случајот до застарување.

„Ова не е редовна одбрана, туку начин да се избегне одговорност. Се надеваме дека судот нема да дозволи делото да застари,“ изјави тој.

Јилдз Веапоска најави дека доколку процесот продолжи да се одложува, ќе организира дневни протести пред Судот во Струга.

„Пет години талкам по институциите. Ако и овој месец нема поместување, ќе протестирам секој ден од 8 до 16 часот. Ова е борба за правда,“ истакна Веапоска.

Случајот се однесува на породување со царски рез во болницата во Струга, по кое на Веапоска ѝ биле отстранети три органи – бубрег, матка и јајник. Обвинети се тројца лекари: гинекологот Мухамед Асани, неговиот син Блертон Асани и доктор Лилјана Јованоска.

Делото застапува ризик да застари во август 2026 година.

Извор: brif.mk

Република

Битола подготвена за снегот: Обезбедени 17 милиони денари за зимско одржување

Општина Битола ќе вложи 17 милиони денари за функционирање на зимската служба во претстојната сезона. Од вкупната сума, 15 милиони денари се наменети за градежна оператива, додека два милиони денари ќе бидат искористени за индустриска сол, песок-ризла и ладна асфалтна маса.

Зимската служба ќе се реализира преку капацитетите на локалните јавни претпријатија, со можност за ангажирање дополнителна оператива доколку временските услови го наложат тоа.

Советот на Општина Битола утврди листа на приоритетни сообраќајници: 50 улици и 14 пристапни патишта до клучни институции се класифицирани како сообраќајници од прв приоритет, а 38 улици како втор приоритет. Посебно внимание е посветено на локалните патишта во руралните делови на општината.

Координативното тело за зимска служба најавува дека, доколку има потреба, од граѓаните ќе се бара соработка, а комуникацијата ќе ја води инженерот задолжен за надзор и реализација на програмата.

Република

Земјотрес го погоди западниот дел на Македонија

Рано утрово во 1:23 часот е регистриран слаб земјотрес во западниот дел на земјава, поточно во околината на Кичево, објави Европскиот медитерански сеизмолошки центар (ЕМСЦ).

Земјотресот, со јачина од 2 степени според Рихтер, се случил на длабочина од 15 километри. Според ЕМСЦ, епицентарот бил лоциран 15 километри југозападно од Кичево, додека Институтот за геолошки науки во Тирана наведува дека земјотресот бил во Општина Дебрца.

Засега нема пријавено материјални штети или други последици од земјотресот.

Република

Забрзана изградба на автопатот Тетово–Гостивар: Николоски објави ново видео од терен

Вицепремиерот и министер за транспорт и врски Александар Николовски објави ново видео на својот Фејсбук-профил, со кое информира за интензивните градежни активности на автопатот Тетово–Гостивар, дел од Коридорот 8.

Во објавата, Николовски наведува дека работата се одвива со силно темпо и дека се прават сериозни чекори кон комплетирање на автопатското решение на овој стратешки коридор.

„Интензивно се работи на автопатот Тетово – Гостивар. Силна динамика во комплетирањето на автопатското решение на Коридорот 8. Ја градиме Македонија“, напиша министерот, додавајќи видео снимки од градежните машини и текот на работите.

Инфраструктурниот проект е еден од клучните сегменти во модернизацијата на патната мрежа во земјата и значајно ќе го подобри движењето меѓу Полошкиот регион и западниот дел на Македонија.