Македонија

Шест лица го загубија животот за четири дена во сообраќајни несреќи

Шест лица го загубија животот за четири дена во сообраќајни несреќи, секојдневно сами го ризикуваме животот поради непочитување на сообраќајните правила и прописи

Во првите четири дена од месец ноември во сообраќајни несреќи на територија на државата животот го загубија шест лица. Од почетокот на оваа година заклучно со октомври регистрирани се 115 жртви. Во текот на минатата година регистрирани се 142 жртви во сообраќајни несреќи. Тоа не се само бројки – тоа се нечиј син, нечија мајка, сопруг, дете. Нечиј деца остануваат без родители и обратно родители остануваат без своите деца. Овој, без дилема, поразителен биланс не е производ на природни катастрофи или воени конфликти, туку резултат на нашата култура, менталитет и однесување во сообраќајот. Несмееме да дозволиме сообраќајот од секојдневна неопходност да прерасне во нужно зло на современото живеење.

Статистиката покажува дека најчестите причинители кои доведуваат до сообраќајни несреќи со фатални последици се пред се непочитувањето на сообраќајните правила, односно користењето на мобилен телефон при возење, возењето со брзина поголема од дозволената, возењето под дејство на алкохол, итн. Апелираме до граѓаните: оставете го мобилниот телефон додека управувате со возилото, не возете со брзина поголема од дозволената, не седнувајте зад воланот доколку сте конзумирале алкохол. Почитувајте ги сообраќајните правила и прописи не го ставајте во ризик вашиот и животот на вашите најмили, како и на останатите учесници во сообраќајот.

Апелираме до родителите: не им дозволувајте на вашите деца да управуваат било какво превозно средство без соодветна обука и дозвола. Сообраќајната култура мора да им се вгради и вгнезди на децата уште од најмала возраст, а тука големо влијание имаат родителите и целокупниот воспитно-образовен процес.
Затоа уште еднаш, со најголема одговорност апелираме до сите учесници во сообраќајот, бидете совесни, внимателни и дисциплинирани. Една непромислена одлука – возење со мобилен телефон во рака или со брзина поголема од дозволената, или под дејство на алкохол – може да го одземе вашиот или нечиј друг живот.

Нема ништо поважно од човечкиот живот. Безбедноста на патиштата не зависи само од полицијата и контролите, туку пред сè од секој поединец зад воланот.
Министерството за внатрешни работи ќе продолжи со засилени контроли на терен, но вистинската промена почнува со одговорноста на секој возач. Почитувајте ги правилата, намалете ја брзината и не седнувајте зад волан под дејство на алкохол. Да возиме со ум, не со емоции. Да не дозволиме нашето невнимание да биде причината некој да не се врати дома.

Македонија

Секој трет граѓанин во Македонија се соочува со мито, покажува новиот извештај на МЦМС

Секоја трета личност во Македонија се соочила со барање или дала мито за да заврши административна или институционална обврска, покажува новиот извештај за корупција на Македонскиот центар за меѓународна соработка (МЦМС).

Директорот на МЦМС, Александар Кржаловски, на одбележувањето на Меѓународниот ден за борба против корупцијата изјави дека на 37% од испитаниците им било побарано мито, а 31% признале дека навистина дале мито за да ја добијат услугата што ја барале. Според него, корупцијата е втор најголем општествен проблем во земјата и, загрижувачки, „во голема мера прифатена“ во секојдневието.

Извештајот укажува на ниска доверба во правосудството – судиите и обвинителите се меѓу институциите со најниска оценка кај граѓаните, додека довербата во Парламентот е нешто повисока.

Заменик-шефот на Делегацијата на ЕУ, Бен Нупнау, порача дека Европската унија останува посветена на поддршката во борбата против корупцијата, но предупреди дека веќе три години нема значителен напредок. Тој апелираше за нов Кривичен законик, суштински реформи и деполитизација на правосудството.

Швајцарскиот и шведскиот амбасадор, Кристоф Зомер и Ола Сулстром, нагласија дека потребен е системски, долгорочен пристап за реални резултати, додека ОБСЕ порача дека промените се достижни само со активна и искрена имплементација на реформите.

Македонија

ВИДЕО: Малиот херој Лир ја победи тешката болест и заѕвони на победничкото ѕвонче

Клиниката за детски болести во Скопје соопшти радосна вест за малото дете Лир, кое ја заврши својата тешка битка со болеста и успешно ја помина третманската процедура.

„Победничкото ѕвонче повторно силно заѕвони за да слушнат сите дека нашиот јунак Лир храбро ја помина и ја освои тешката битка“, стои во соопштението од Клиниката.

На Лир му посакуваат многу здравје, среќно и безгрижно детство, со надеж дека ќе продолжи да расте во радост и среќа.

Видеото може да го погледнете тука

Македонија

УХМР издаде „жолт хидроаларм“: Поплави и излевање на реки можни во пола Македонија

Од Управата за хидрометеоролошки работи (УХМР) денеска предупредија на потенцијална опасност од поплави и излевање на реки во јужните и југoисточните делови на земјата поради циклонска активност. Обилни врнежи се најавуваат за утре, а тоа може да предизвика зголемен водостој на реките и суводолиците.

Според прогнозата, висок водостој се очекува во сливовите на реките Струмица, Анска, Вардар (долен дел), како и помалите реки и суводолиците во регионот на Гевгелиско-Валандово, Дојран, Битолскиот дел од сливот на Црна и Охридско-Преспанскиот регион.

УХМР апелира на внимателно движење покрај реките и суводолиците, бидејќи на некои места локално е можно излевање. За утрешниот ден е издадено „жолто“ ниво на предупредување за поплави, поради ризик од активирање на помалите реки и суводолиците.