Новопоставениот мост Хонгќи во кинеската провинција Сечуан делумно се срушил, а сè уште не е познато дали има повредени или загинати. Дел од приодот кон мостот и дел од самата конструкција се урнале, предизвикувајќи свлечишта во околината, пренесува „Ројтерс“.
Мостот, долг 748 метри, е дел од државниот автопат што ја поврзува провинцијата Сечуан со Тибет. Според првичните информации, пукнатините се појавиле поради обилните врнежи во последните денови.
Изградбата на мостот беше завршена порано оваа година, а за проектот одговараа компаниите „Сечуан роудс“ и „Бриџ груп“. Местото сега е покриено со густ облак од сив чад поради урнатините, а локалните власти започнале итни операции за проверка на безбедноста и евакуација на евентуално загрозените жители.
