Република

Прилеп со успешна еко-акција за почиста околина и поубав град!

Во рамките на еко-акцијата „Еко мисија – твојот потпис за природата“, денес над 1.000 прилепчани здружено излегоа да ја исчистат својата околина и градот.

Чистење се извршуваше на повеќе од 20 локации, меѓу кои: излетничките места околу комплексот „Вештачко Езеро“, просторот кај Селце во близина на манастирот Св. Димитрија, околината на населеното место Волково, јавните површини покрај влезовите во градот на ул. „Орде Чопела“, на ул. „Леце Котески“, ул. „Александар Македонски“ кон Ново Лагово, околината на образовните институции, Могилата на Непобедените, како и повеќе диви депонии со градежен шут.

Во акцијата активно се вклучија Општинската и јавната администрација, јавните претпријатија, бизнис-секторот со механизација и човечки ресурси, ученици од основните и средните училишта, извидници, младински организации, претставници од здруженија на граѓани и многу волонтери.

Градоначалникот Проданоски, кој учествуваше на терен заедно со администрацијата, истакна дека подигањето на јавната свест, зајакнувањето на јавните претпријатија и воведувањето на поригорозни мерки се клучни за одржување на чиста околина:

„Прво, треба да ја подигнеме свеста за тоа што денес го правиме. Второ, јавните претпријатија да ги подигнеме на повисоко ниво за да испорачуваат подобро одржување на јавните површини, со унапредување на механизацијата и процесите. Понатаму, мора да го зајакнеме системот на казнени мерки бидејќи кај дел од граѓаните е неопходен поинаков пристап за да престанат да фрлаат отпад каде ќе стигнат. Планираме и поставување видео надзор на клучни локации во градот, како и освежување на правилниците за комунален ред.“

Градоначалникот додаде дека локацијата кај Волково, на површина од околу 30.000 квадратни метри, е планирана за уредување во парк и рекреативна зона:
„Токму затоа симболично почнавме со чистење, за да уредиме ново катче за рекреација и да дадеме пример дека излетничките и рекреативните места мора да бидат чисти и пријатни за користење. Охрабрен сум и силно мотивиран да продолжиме со вакви акции.“

Посебно беа активни младите, учениците од основните, средните училишта и најмладите од детските градинки, кои заедно со воспитувачите и родителите учествуваа во уредување и бојадисување на дрворедите и парковските површини.

Масовната вклученост ја потврди заедничката цел, подигнување на јавната свест, поттикнување на одговорно однесување и создавање почиста и поубава животна средина.

Република

Забрзана изградба на автопатот Тетово–Гостивар: Николоски објави ново видео од терен

Вицепремиерот и министер за транспорт и врски Александар Николовски објави ново видео на својот Фејсбук-профил, со кое информира за интензивните градежни активности на автопатот Тетово–Гостивар, дел од Коридорот 8.

Во објавата, Николовски наведува дека работата се одвива со силно темпо и дека се прават сериозни чекори кон комплетирање на автопатското решение на овој стратешки коридор.

„Интензивно се работи на автопатот Тетово – Гостивар. Силна динамика во комплетирањето на автопатското решение на Коридорот 8. Ја градиме Македонија“, напиша министерот, додавајќи видео снимки од градежните машини и текот на работите.

Инфраструктурниот проект е еден од клучните сегменти во модернизацијата на патната мрежа во земјата и значајно ќе го подобри движењето меѓу Полошкиот регион и западниот дел на Македонија.

Република

Женa повредена при судир со службено возило на МВР во Охрид

На 7 декември 2025 година околу 09:40 часот, во Охрид се случи сообраќајна несреќа на крстосницата помеѓу улиците „7 Ноември“ и „Васил Главинов“, во која учествуваа патничко возило „Пежо“ со охридски регистарски ознаки и службено возило на МВР — управувано од полициски службеник.

Повредена е 44-годишната жена (Л.Т.) која го управувала „Пежо“, која беше пренесена во болница за укажување на лекарска помош. Во моментот нема информации за степенот на повредите.

МВР ја презеде истрагата — инспекциската екипа одговорна за увид е на терен, а сообраќајот на местото на настанот беше привремено регулиран заради истражувачки активности.

Република

Тоневски: Делото на Св. Климент е наш водич кон мудрост и духовен развој

Градоначалникот на Пробиштип, Тони Тоневски, по повод празникот посветен на Свети Климент Охридски, упати честитка до граѓаните, нагласувајќи ја неговата огромна улога во просветителската и духовната традиција на македонскиот народ.

Тоневски потсети дека Свети Климент, како еден од најзначајните ученици и продолжувачи на мисијата на светите браќа Кирил и Методиј, ја создал прочуената Охридска книжевна школа – место од кое се ширеле писменоста, образованието и духовноста ширум македонските простори.

„Неговото дело е длабоко вткаено во нашата историја и претставува траен потсетник за важноста на знаењето, писменоста и културното наследство“, истакна Тоневски.

Градоначалникот додаде дека ликот и делото на Свети Климент се пример за посветеност што опстојува низ вековите и продолжува да инспирира, па затоа општеството има должност да ја чува и негува неговата вредна оставнина.

„Нека е честит и вековит празникот!“, порача Тоневски во крајот на честитката.