Израелскиот премиер Бенјамин Нетанјаху, заедно со неколку министри од неговата влада, повторија дека остануваат цврсто против формирањето палестинска држава, во пресрет на гласањето во Советот за безбедност на ОН за американската нацрт-резолуција за Газа, кое е закажано за понеделник.
За разлика од претходните верзии, новиот нацрт кој го поддржува мировниот план на американскиот претседател Доналд Трамп за Газа, отвора можност за создавање палестинска држава – нешто на што официјален Ерусалим со години жестоко се противи.
„Нашето противење на палестинска држава на кој било дел од територијата не се променило“, изјави Нетанјаху на почетокот од редовната седница на владата, додавајќи дека не му се потребни „ничии предавања“ по ова прашање.
Крајнодесничарскиот министер Безалел Смотрич вчера го обвини премиерот дека молчи откако Франција и уште неколку земји во септември ја признаа Државата Палестина.
„Испратете јасен и цврст одговор што ќе му стави до знаење на целиот свет: никогаш нема да има палестинска држава на нашата татковина“, напиша Смотрич на Х.
Друг член на крајната десница, Итамар Бен-Гвир, изјави дека неговата партија „Еврејска моќ“ нема да биде дел од „ниедна влада што ќе прифати“ воспоставување палестинска држава.
Министерот за одбрана Израел Катц и министерот за надворешни работи Гидеон Саар, исто така преку Х, ја повторија својата категорична позиција против палестинска државност.
Американската нацрт-резолуција го поддржува планот на Доналд Трамп, кој на 10 октомври доведе до постигнување кревко примирје во Појасот Газа по две години војна.
