Украинскиот претседател Володимир Зеленски, за време на својата деветта посета на Франција од почетокот на руската инвазија во 2022 година, потпиша писмо за намери со францускиот претседател Емануел Макрон за набавка на околу 100 борбени авиони „Рафал“. Потврдата ја даде Елисејската палата.
Претпоставениот договор, кој се очекува да се реализира во следната деценија, ќе вклучува и дополнителни системи за оружје, меѓу кои француско-италијанскиот систем за воздушна одбрана SAMP-T, радарска технологија и беспилотни летала. Макрон истакна дека оваа набавка ќе придонесе кон „регенерацијата на украинската армија“ и ќе ја зајакне одбраната на земјата.
Зеленски во последните недели преговара со повеќе партнери за дополнителни до 250 борбени авиони, вклучувајќи ги француските „Рафал“, американските „Ф-16“ и шведските „Грипен“. Во моментов, украинските воздухопловни сили се во голема мера зависни од авиони од советска ера, со помалку од 100 функционални летала, додека флота вклучува девет „Ф-16“ и два „Мираж 2000“.
Претходно, Зеленски потпиша и писмо за намери со Шведска за набавка на 100 до 150 авиони „Сааб Грипен-Е“, кои се очекува да бидат достапни најмалку по три години. Франција досега обезбеди воена помош за Украина во вредност од 8,6 милијарди евра, вклучувајќи ракети, хаубици, оклопни возила, системи за воздушна одбрана и авиони „Мираж“.
Зеленски, заедно со Макрон, посети и францускки воздушни бази и седиште на мултинационални украински сили, а двајцата лидери ќе присуствуваат и на француско-украински форум за дронови.
