СВР Скопје поднесе кривична пријава до ОЈО Скопје против правно лице од Скопје и неговиот сопственик и поранешно одговорно лице М.С., поради сомнение за „Даночно затајување“ и „Оштетување или повластување на доверители“, соопшти полицијата. Според истрагата, пријавениот се стекнал со противправна имотна корист од вкупно 31.433.522 денари, со што бил причинет значителен финансиски удар врз Буџетот на Република Македонија.
Од Единицата за економски и компјутерски криминал информираат дека М.С. во периодот од 1 октомври 2019 до 31 август 2021 година пријавувал помал даночен долг, спротивно на членовите 40 и 43 од Законот за ДДВ. Тој не евидентирал промет вреден 103.969.681 денар од продажба на основни средства и залихи на материјали, со што избегнал плаќање ДДВ во износ од 17.645.477 денари.
Исто така, пријавениот постапил спротивно на Законот за личен доход, со што од дополнително утврдениот промет од 121.615.158 денари не бил платен персонален данок на доход во висина од 13.788.045 денари. Со двете злоупотреби, тој противправно се стекнал со корист од над 31 милион денари, или околу 515.000 евра.
Полицијата дополнително утврдила дека од почетокот на 2020 година до отворањето на стечајната постапка, пријавениот неевидентирано ги отуѓил основните средства и залихите на фирмата во вредност од речиси 104 милиони денари. Поради тоа, имотот не можел да биде попишан од стечајниот управник и да влезе во стечајната маса, што довело до значително оштетување на доверителите – државни институции, банки и други правни субјекти со утврдени побарувања.
Случајот е предаден на надлежното обвинителство, каде се очекуваат понатамошни постапки.
