Повеќе од 53 проценти од словенечките граѓани гласаа против усвојувањето на Законот за асистирано доброволно завршување на животот на денешниот референдум, со што предложениот закон беше одбиен. Според 94,74 проценти од преброените ливчиња, 53,04 проценти или 340.789 гласачи се изјасниле ПРОТИВ, додека 46,96 проценти или 301.784 гласачи го поддржале законот, објави N1 Словенија.
Иницијаторите требаа да обезбедат доволен излезност и помалку од 339.210 гласа „против“ за законот да помине, услов кој не беше исполнет.
Поддржувачите на законот го изразија своето разочарување. Андреј Плетерски од здружението „Сребрена нит“ изјави дека „денес нема да биде историски ден за никого“, додавајќи дека борбата за донесување на овој закон ќе продолжи во иднина. Според него, прашањето нема да може повторно да се отвори следната година, но ќе остане приоритет подоцна. „Овој закон сигурно ќе биде донесен во оваа земја, тоа е историска неопходност“, изјави Плетерски.
Разочараност изрази и пратеничката од Партијата на слободата, Тереза Новак, која им се заблагодари на над 300.000 гласачи што го поддржаа законот. Таа верува дека законското решение ќе се врати на дневен ред во иднина. „Штета е што сега го нема, особено за луѓето на кои им е потребен токму во овој момент“, рече Новак.
На референдумот граѓаните решаваа дали да се воведе закон што би му овозможил на возрасен пациент, способен за самостојно одлучување, доброволно да го прекине својот живот во случај на неподносливо страдање поради тешка, неизлечива болест или трајно нарушување на здравјето.
